Kreu i Partisë së Lirisë, Ilir Meta e ka quajtur të çuditshëm vendimin për shkarkimin nga detyra të Drejtorit të Policisë së Shtetit, Gledis Nano. Ai shtoi se Nano u bë ‘kokë turku’ nga qeveria Rama.
“Një vendim i çuditshëm por tashmë edhe i zakonshëm. Kur priteshin përgjegjësi në nivele të larta politike për dështimin e rëndë të rendit public dhe sigurisë në vend, thjeshtë është e qartë që u bë edhe një kokë turku e radhës, i cili vetëm 10 muaj më parë u promovua me shumë entuziasëm dhe vlerësime si një prurje e re, cilësore dhe shpresëdhënëse për drejtimin ligjor dhe qytetar të poliisë së shtetit”, tha Meta.
Kreu i Partisë së Lirisë nënvizoi se Edi Rama është personi që komunikon me bandat.
“Për vrasjet që ndodhin çdo ditë në mes të qyteteve dhe të autostradave tona ta kërkojnë tek njeriu që komunikon drejtpërdrejt me krimin. Dua tu bëj thirrje punonjësve të policisë, të bëjnë gjithçka që të zbatojnë ligjin dhe të mos përdoren nga politika. Ora e ligjit edhe në policinë e shtetit po vjen”, u shpreh ai më tej.
