Ministria e Brendshme ka përgjegjësi për krimet e pazbardhura në vend, por qeveria mendoi të përpiqej të zgjidhte situatën duke shkarkuar nga posti i Drejtorit të Përgjithshëm të Policisë, Gledis Nanon.
Kjo ishte pak a shumë ajo që tha ministri i Brendshëm Bledi Çuçi, gjatë një komunikimi me gazetarët pas mbledhjes së qeverisë, ku u vendos shkarkimi i Gledis Nanos si kreu i Policisë së Shtetit.
Çuçi kumtoi se “shkarkimi (i Gledis Nanos) lidhet me mos-përmbushjen e objektivave që i ishin caktuar Drejtorit të Përgjithshëm dhe kryesisht me situatën e muajve të fundit, që kërkon një reagim më të fortë dhe menaxhim më efikas të Policisë së Shtetit”.
Vendimi në fakt vjen në një moment kur ngjarje të rënda kriminale kanë ndodhur në vend së fundmi dhe shumë mbeten të pazbardhura. 27 persona kanë humbur jetën në 23 vrasje të ndodhura gjatë kësaj vere, mes tyre edhe disa atentate mafioze.
Por, a ka ministria e Brendshme e drejtuar nga Çuçi përgjegjësi për situatën e krimit përpos Policisë së Shtetit? Pyetja iu drejtua ministrit nga gazetarët: Zoti ministër kur ju flisni për përgjegjësi që ka tashmë drejtori i shkarkuar Gledis Nano, po ju vetë si ministër nuk keni përgjegjësi për aq kohë sa policia është në varësi të ministrisë suaj? Ngjarjet e pazbardhura të krimit nuk lidhet vetëm me Drejtorin e Policisë, por edhe me punën e ministrisë.
Në përgjigjen e tij, Çuçi e pranoi se ka përgjegjësi, por shtoi se qeveria mendoi t’i japë zgjidhje situatës duke shkarkuar Gledis Nanon.
“Pa diskutim ka shkallë përgjegjësie”, tha ai.
Por shtoi se “deri tani Këshilli i Ministrave, qeveria ka menduar që ndryshimi i menaxhimit përmes shkarkimit të Drejtorit të Përgjithshëm të Policisë është besoj unë një masë efikase për të pasur një reagim më të fortë në luftën kundër krimit”.
Dorëheqja e Çuçit është kërkuar disa herë nga opozita së fundmi pas vrasjeve që kanë ndodhur në qytete të ndryshme, mes tyre edhe atentate të stilit mafioz.
