Ka qenë në kufijtë e obsesionit përndjekja që i bëhej Hamza Muskurtit në rrjetet sociale në muajt e fundit. Një mori postimesh ofenduese, video dhe fotomontazhe mbushur me sharje që publikoheshin rregullisht nga një profil në Facebook. Me dhjetëra mesazhe, si pjesë e një fushate denigrimi ishin intensifikuar muajt e fundit. Akuza për ngacmime seksuale, përmendja e bashkëshortes si një grua amorale, implikimi në marrëdhëniet me punonjëset e kompanisë, apo sharjet për fëmijët e mitur kanë qenë të përditshme. Në shënjestër qe Hamza Muskurti, i cili nga ana e tij fajësonte të vëllain dhe kunatën. Një situatë që e çoi deri në çmendurinë e vrasjes.
Gjithçka kishte nisur si një konflikt për pronën. Dy vëllezërit kishin ndarë kompaninë e përbashkët dhe banesën e familjes, por më i madhi duket se kishte mbetur i pakënaqur. Konflikti vazhdonte prej vitesh sipas fqinjëve në rrugën Islam Alla. Por kohët e fundit, vëllai më i vogël, Hamzai e kishte parë veten si viktimë të një serie sulmesh në rrjetet sociale nga një profil me emrin Visiana Dada.
Madje në njërin prej tyre Hamza Muskurti akuzohej edhe për shfrytëzim prostitucioni, trafik droge dhe vrasjen e ish-shokut të tij Iliaz Çali. “Arsen Musa Muskurti personi me i njohur ne dyeret e policise se shtetit per te krijuar besushmeri ne syte e tyre dhe sinqeritet dhelperor tregtar prostitutash dhe lende narkotike ne dubai vrases i Iljas Çalit ( ishte shoku i tij femirie bashke studiues ne arabine saudite ne degen Daëe ) me prishjen e pazareve te prostitucionit Arsen Musa Muskurti me sherbim pagese dhe me ndihmen e policeve vret shokun e tij Iljas Çalin” thuhet në statusin e datës 5 Gusht.
