Moska ka reaguar pasi Kosova e Serbia u dakorduan të shtunën që shkoi që qarkullimi ndërmjet dy vendeve të bëhet me letërnjoftime.
Sipas Ministrisë së Jashtme të Rusisë “arritja e një kompromisi të pjesshëm për dokumentet personale ndërmjet Beogradit dhe Prishtinës uli disi tensionet në Kosovë dhe Metohi, por pyetja themelore mbetet nëse Perëndimi është i gatshëm të marrë seriozisht interesat legjitime të Serbisë”.
Rusia e cila muaj më parë sulmoi Ukrainën dhe është dule luftuar atje edhe tani thotë se bazë për zgjidhjen e problemit të Kosovës, “deshi apo jo dikush”, mbetet Rezoluta 1244 e Këshillit të Sigurimit të OKB-së, e cila “përcakton qartë integritetin territorial të Serbisë”.
Aleatët e Serbisë thonë se është e papranueshme të zhvlerësohen elementet kyçe të arritura gjatë dialogut ndërmjet Beogradit dhe Prishtinës, sic është “krijimi i Asociacionit të Komunave Serbe si mekanizëm për sigurimin e të drejtave të serbëve në Kosovë dhe Metohi”.
Po ashtu rusët thonë se deklaratat e lidershipit serb për marrëveshjen e arritur konfirmojnë se Beogradi vlerëson me maturi atë që është arritur, si detyrë parësore nënvizon mbrojtjen e të drejtave të serbëve në Kosovë dhe “nuk ka iluzione për mundësinë e ndryshimit të qasjes proshqiptare e Perëndimit”.
Rusët theksojnë se “po i ndjekin nga afër ngjarjet dramatike në Kosovë” dhe se situata atje është përshkallëzuar përsëri muajin e fundit, duke iu afruar skajit të një konflikti ndëretnik për shkak të qëllimit të “autoriteteve të vetëshpallura”, sic I referohen ata Republikës së Kosovës.
Diplomacia ruse ka akuzuar BE’në e cila, sipas tyre, ka treguar edhe një herë pafuqi dhe mosgatishmëri për të hyrë në “klinç” me “elitën arbitrare të shqiptarëve të Kosovës, madje edhe butësi ndaj ekstremistëve të Prishtinës”.
Pastaj rusët, në deklaratë, merren me Ambasadorin amerikan në Beograd, Chris Hill.
“Presioni ndaj Serbisë për shkak të Kosovës dhe Metohisë vjen në mes të tentativave për të prishur marrëdhëniet e saj me Rusinë”
“Amerikani çuditërisht me kokëfortësi nuk dëshiron të shohë shenja miqësie midis Serbisë dhe Rusisë. Në të njëjtën mënyrë, ka indinjatë për vizitën e fundit në Rusi të Ministrit të Brendshëm të Serbisë, Aleksandar Vulin. A është puna e një Diplomati amerikan të vlerësojë udhëtimet e përfaqësuesve të qeverisë serbe”, pyet Ministria ruse.
“Me deklaratat e tij sinqerisht të vrazhdë për këtë, zyrtari i Departamentit të Shtetit ka ekspozuar edhe një herë qëndrimin thellësisht armiqësor të Uashingtonit ndaj politikës së pavarur multivektoriale të Beogradit, mbi bazën e së cilës ndërtohet bashkëpunimi ruso-serb, i cili nuk futet në llogaritjet amerikane të një monopoli në lidhjet Perëndimin me Serbinë” theksohet në deklaratë.
