Kryediplomati rus Sergei Lavrov, në një intervistë për televizionin “Zvezda”, ka deklaruar se Perëndimi e njeh Kosovën në mënyrë të njëanshme si shtet.
Lavrov thotë se kjo u shkon për shtat vendeve perëndimore, por nuk është në përputhje me funksionimin e të drejtës ndërkombëtare.
“Perëndimi, në përpjekje për të ruajtur dominimin dhe për të shkuar kundër rrjedhës objektive të historisë, refuzon të drejtën ndërkombëtare. Rregullat janë shpikur në varësi të detyrës specifike. Kur të jetë e nevojshme, Perëndimi është i gatshëm të njohë pavarësinë e shpallur ilegalisht, pa asnjë referendum, në mënyrë të njëanshme, siç ishte rasti me Kosovën”, tha ai.
Intervista është publikuar në faqen zyrtare të Ministrisë së Jashtme ruse.
Lavrov gjithashtu vuri në dukje se kur Perëndimit nuk i pëlqen të njohë ndonjë shtet si të pavarur, nuk e bën këtë. “Kjo ndodhi, për shembull, me Krimenë”, tha ai.
