Moskë – Një gazetar i pavarur rus është akuzuar se ka financuar një organizatë ekstremiste duke dhuruar një sasie të vogël parash për një fondacion të krijuar nga lideri i opozitës ruse i burgosur, Alexei Navalny, në foton më sipër. Lajmin e dhanë mediat ruse të hënën.
Kjo është ndjekja e parë penale e njohur publikisht për dhurimin për organizatat e Navalny-t që kur ato u shpallën ekstremiste dhe të jashtëligjshme verën e kaluar – një taktikë me sa duket e re që autoritetet ruse kanë zgjedhur për të thelluar goditjen e tyre ndaj disidencës.
Radio Liberty citoi kolegët e Andrei Zayakin të kenë thënë se ai u arrestua në banesën e tij në Moskë të dielën dhe u dërgua para gjykatës të hënën. Nëse shpallet fajtor, ai rrezikon deri në tetë vjet burg.
Sipas “Mass Media Defense Center”, një grup i të drejtave që po ndihmon në mbrojtjen e Zayakin, hetuesit e akuzojnë gazetarin se ka dhuruar 1000 rubla (rreth 16 dollarë) për Fondacionin e Navalny për Luftën kundër Korrupsionit. Zayakin, i cili shkroi për gazetën e pavarur ruse Novaya Gazeta dhe botime të tjera, e kaloi natën në një qeli policie.
Të hënën, një gjykatë miratoi kërkesën e hetuesve për të vendosur një ndalim qarkullimi për të midis orës 20:00 dhe orës 08:00, e ndalojnë atë të përdorë internetin dhe telefonin si edhe të komunikojë me persona të tjerë të implikuar në këtë rast, megjithëse nuk ishte menjëherë e qartë nëse kishte të tillë.
Autoritetet ruse kanë vënë në shënjestër gjithnjë e më shumë kritikët dhe kundërshtarët në vitet e fundit, veçanërisht pasi vendi filloi atë që e quan “operacionin e tij special ushtarak” në Ukrainë më 24 shkurt.
Navalny është në burg për një sërë akuzash që ai i quan të motivuara politikisht dhe vazhdon të flasë përmes rrjeteve sociale. Një gjykatë ruse vitin e kaluar e cilësoi Fondacionin e tij për Luftimin e Korrupsionit, si dhe rrjetin e tij të zyrave rajonale, si ekstremist dhe e ndaloi punën e tij në Rusi.
Zayakin, i cili ka një diplomë në matematikë dhe fizikë, bashkëthemeloi një projekt të njohur gjerësisht të quajtur Dissernet, i cili synon të ekspozojë korrupsionin dhe plagjiaturën në shkencën ruse duke hetuar tezat e doktoraturës – veçanërisht ato të shkruara nga zyrtarë qeveritarë.
Gjithashtu të hënën, autoritetet ruse arrestuan një tjetër kritik të shquar të Kremlinit, Leonid Gozman, me akuzën e krahasimit publik të Bashkimit Sovjetik me Gjermaninë naziste. Gozman përballet me gjobë ose arrest administrativ me 15 ditë.
