Pedagogu në Universitetin e Arteve, Ardian Isufi thotë se sistemi aktual i formularëve për aplikime në universitete, është çorientues.
Në një intervistë për “Euronews Albania”, Isufi u shpreh se maturantët nuk duhet të zgjedhin dhjetë preferenca, ashtu sikur është aktualisht.
Sipas tij, një pjesë e madhe e preferencave, plotësohen edhe pse maturantët nuk kanë interes real për to dhe shtoi se duhet të reduktohen në dy ose tre.
“Nuk mendoj se ka nevojë për dhjetë zgjedhje. Në pjesën dërrmuese, shtatë ose tetë zgjedhje, studentët aplikues i bëjnë dhe nuk u intereson fare. Ata duhet t’i aplikojnë sepse ashtu është formulari i aplikimit. Kjo është parë dendur jo vetëm në Akademinë e Arteve, por edhe anketimeve të tjera.
Kuptohet që ky lloj çorientimi që i bëhet maturantëve për t’u orientuar realisht te degët apo fushat ku ata kanë dhuntinë dhe dëshirën, ky lloj sistemi me 10 preferenca, është një sistem çorientues. Për një raund të dytë, nëse do pakësohet elementi i kaq shumë preferencave, por të jenë 2-3 preferenca për çdo të interesuar”, theksoi pedagogu.
