Përmbytjet e shpejta të shkaktuara nga shirat e dendur të musonit në pjesën më të madhe të Pakistanit kanë vrarë afro 1000 njerëz dhe kanë plagosur e zhvendosur mijëra të tjerë që nga mesi i qershorit, thanë zyrtarët këtë fundjavë.
Numri i ri i të vdekurve doli një ditë pasi kryeministri Shahbaz Sharif kërkoi ndihmë ndërkombëtare në luftimin e dëmeve vdekjeprurëse nga përmbytjet në vendin e varfër islamik.
Sharif tha se 33 milionë njerëz ishin prekur nga përmbytjet – rreth 15% e të gjithë popullsisë së Pakistanit – dhe fajësoi “tmerret e ndryshimeve klimatike” për fatkeqësinë natyrore.
Megjithatë, ndërtimet në zonat e rrezikuara nga përmbytjet, korrupsioni endemik, mungesa e investimeve në infrastrukturë, konsiderata e pakët për mjedisin dhe gatishmëria e dobët për fatkeqësitë natyrore gjithashtu i përkeqësojnë problemet kur ndodhin përmbytjet.
Sezoni i musoneve, i cili filloi më herët se normalisht këtë vit, e ka goditur Pakistanin me shira veçanërisht të dendur dhe ekipet e shpëtimit kanë luftuar për të evakuuar mijëra njerëz të izoluar, nga zonat e goditura nga përmbytjet. Kriza e detyroi qeverinë të shpallte gjendjen e jashtëzakonshme.
Në përgjigje të thirrjes së Sharifit për ndihmë ndërkombëtare, Kombet e Bashkuara planifikuan një kërkesë të shpejtë prej 160 milionë dollarësh për donacione, e cila do të nisë më 30 gusht.
