Policia australiane ka sekuestruar një sasi rekord të drogës me vlerë 1.1 miliardë dollarë, e fshehur në blloqe të mëdha mermeri.
Më shumë se 1,800 kg metilamphetaminë u gjetën në disa kontejnerë detarë që mbërritën në portin e Sidneit gjatë javëve të fundit të fshehura në pllaka mermeri. Droga e sekuestruar, konsiderohet si sasia më e madhe e kapur ndonjëherë në vend.
“Ajo që mësuam sot është se kapacitetet e kësaj sindikate kriminale, në volum dhe sasi janë tepër të mëdha. Këto shifra janë shqetësuese”, u shpreh një zyrtar i policisë.
Asnjë person nuk është arrestuar deri më tani në lidhje me sekuestrimin e fundit, por policia australiane vuri në pranga tre persona për një sasi tjetër droge të fshehur në pllaka mermeri gjatë javës së kaluar.
Të gjitha dërgesat mësohet se e kanë origjinën nga rajoni i Lindjes së Mesme. Metilamphetamina është një nga varietetet më të fuqishme të drogës amfetamine.
