Nga Boldnews.al
Në 25 Korrik të këtij viti, Kryeministri Edi Rama njoftoi nëpërmjet rrjetit social “Twitter” se kishte vendosur shkarkimin e zëvendësit të tij, Arben Ahmetaj.
Për këdo që ndjek veprimtarinë kryeministrore, është lehtësisht e kuptueshme se shkarkimet nëpërmjet rrjeteve sociale janë një detaj që Rama dëshmon se “përzë me inat” bashkëpunëtorët e tij.
Shkarkimi i Ahmetajt isht disi surprizë. Raportet e tij me kryeministrin kanë pasur disa ulje-ngritje.
Arben Ahmetaj ka mbajtur role kyç në mandatin e parë dhe të dytë qeverisës së Ramës, fillimisht si Ministër i Zhvillimit Ekonomik dhe më tej në drejtimin e Financave.
Largohet në mënyrë të papritur në janar 2019. Zërat brenda korridoreve kryeministrore flisnin për një krisje të fortë të raporteve mes tij dhe kryetarit të kabinetit qeveritar.
Por, për Arben Ahmetaj gjendet sërish rruga për t’u kthyer në qeveri.
Në fund të Dhjetorit 2019, Rama i beson atij ministrinë që qarkullon me dhjetra milionë euro, atë të Rindërtimit, një post që u krijua pas tërmetit tragjik të 26 Nëntorit të atij viti.
Rama i beson më tej Ahmetajt edhe fondet për përballimin e pandemisë Covid-19. Dukej se mes Ramës dhe Arben Ahmetajt ishte rikthyer “muaji i mjaltit” politik.
Por, shpërthimi i skandalit të inceneratorëve, riktheu sërish krisjen mes tyre.
Ahmetaj është një prej zyrtarëve më të akuzuar për përfshirjen e tij në afera me miqtë-biznesmenë Klodian Zoto e Mirel Mërtiri.
Rama, në tentativë për të zbutur tonet opozitare kundër aferës së inceneratorëve, e cila e sheh edhe vetë kryeministrin në një rol të dorës së parë, vendosi largimin e Arben Ahmetajt nga kabineti qeveritar, në mesin e vapës së korrikut 2022.
A është kjo një tentativë e Ramës për ta dorëzuar Ahmetajn si “peshk” për drejtësinë, apo një mënyrë për ta shpëtuar nga prangat, duke e mënjanuar përkohësisht, me shpresën që të harrohet skandali që rëndon mbi të?
Përgjigja më e saktë do të vijë me kalimin e kohës, megjithëse veprimet e ngathta nga Prokuroria Speciale, SPAK, nuk krijojnë shpresa për goditjen e zyrtarëve të niveleve të larta.
“Boldnews.al” ka raportuar më herët se Arben Ahmetaj ka pasur një rol thelbësor në hartimin dhe nënshkrimin e kontratave për ndërtimin e inceneratorëve në Elbasan, Fier dhe Tiranë.
Hulumtimi i redaksisë, i cili është mbështetur në dokumenta zyrtarë dhe ekskluzivë, dëshmon se është “i dyshuari perfekt” për skandalin e koncensioneve të landfillëve, të fituar nga një grusht biznesmenësh, të lidhur ngushtë mes tyre dhe me Arben Ahmetaj.
Lexo edhe:
“I dyshuari perfekt”/ Arben Ahmetaj, miqësi e miliona për Klodian Zoton e inceneratorëve (Dokumenta)
