Bordi i krijuar me vendim qeveria për caktimin e çmimit të karburanteve ka vendosur rritjen e mëtejshme të naftës.
Sipas vendimit, 1 Litër naftë do të shitet në pompa me 239 Lekë, nga 227 Lekë që tregtohej në bazë të vendimit të mëparshëm.
Benzina është rritur gjithashtu nga 201 Lekë për Litër në 205 Lekë për Litër, ndërsa çmimi i gazit nuk ka ndryshuar: 78 Lekë/Litri.
Çmimet e caktuara do të hynë në fuqi sot në ora 18.00 dhe do të jenë të vlefshme deri në mbledhjen e ardhshme të bordit.
Në një njoftim të bordit thuhet se, “pavarësisht se çmimet në bursë kanë pasur tendencë rritje, në javën e fundit, Bordi nuk ka marrë vendim të menjëhershëm për rritjen e çmimit të nënprodukteve”.
Shqipëri mbetet ndër vendet ku nafta tregtohet më shtrenjtë, pavarësisht ekonomisë së dobët. Së fundmi, “Global Price Indeks” e renditi Shqipërinë të 14 në botë për çmimin më të lartë të një litër nafte, duke lënë pas edhe vend te zhvilluara si Singapori dhe Gjermania.
