Dosja për dy shtetasit rusë dhe ukrainasin të dyshuar për spiunazh është dërguar në gjykatë. Raportohet se se është kërkuar masa e sigurisë “arrest me burg” për 3 shtetasit e huaj.
Pritet që seanca gjyqësore të zhvillohet ditën e nesërme.
Ngjarja që ndodhi 3 ditë më parë në uzinën e Gramshit:
Dy shtetas rusë, 33-vjeçarja Svetlana Timofoeva, 23-vjeçari Mikhail Zorin dhe një ukrainas, Fiodor Mihailoviç u arestuan mbrëmjen e së shtunës pas një incidenti në uzinën ushtarake në Gramsh. Teksa tentoi të futej në uzinë, shtetasi rus sulmoi me spray neuro-paralizues dy ushtarët shqiptarë.
Në dëshminë e tyre, shtetasit e huaj kanë thënë se janë blogerë dhe fotografonin kryesisht territore ushtarake që janë të braktisura dhe nuk përdoreshin më nga shteti.
Tashmë mbi ta rëndon zyrtarisht akuza e “Dhënia e informatave sekrete”, dhe “Sigurimi i informatave”.
Për këtë ngjarje ministri i Mbrojtjes, Niko Peleshi u shpreh një ditë më parë se rasti po hetohet me seriozitet dhe se nuk përjashtohet të jetë bërë për të tërhequr vëmendjen nga një ngjarje tjetër.
