Niko Peleshi, ministër i Mbrojtjes dhe Bledi Çuçi, ministër i Brendshëm, dolën në një konferencë të përbashkët për shtyp, këtë të hënë, duke dhënë detaje në lidhje me ngjarjen e së shtunës ku 3 turistë, dy rusë dhe një ukrainas, u futën në uzinën e Gramshit dhe plagosën dy ushtarë.
Peleshi u shpreh se kjo ngjarje duhet parë me kujdes pasi mund të ketë pasur synim edhe për të devijuar vëmendjen nga një tjetër skenar.
Në nisje të fjalës së tij, ai sqaroi se uzina e Gramshit mund të vizitohet me leje të veçantë – aktivitetet sporadik të demontimit të armëve – shkatërrimi dhe çuarja për skrap e armëve që sekuestrohen nga policia në aksione.
Për rastin konkret, ai shtoi se “kemi të bëjmë me një grup të huajsh që s’kanë tentuar ta vizitojnë me leje, por njëri ka kapërcyer rrethimin dhe kur është hasur me personelin ushtarak ka reaguar në mënyrë të dhunshme”.
Ai tha se këta persona kanë qenë edhe në zona të tjera në Shqipëri.
Sipas ministrit, ngjarja mund të ketë qëllim edhe tërheqjen e vëmendjes.
“Nuk është hera e parë që turistët kanë kuriozitet të fotografojnë zona të vjetra të ushtrisë. Ka disa nivele klasifikimi të bazave të ushtrisë. Padyshim, ato që janë të klasifikuara, nuk është e lehtë të depërtohet. Por kemi edhe shumë zona të tjera që mund të vizitohen me leje. Ky është rasti i tre uzinave tona. Ne nuk kemi sot industri ushtarake”, u shpreh Peleshi.
“Ngjarja e Gramshit po trajtohet me seriozitet për shkak të dhunës , dhe faktit që kemi të bëjmë me tre të huaj me pasaporta ruse që nuk kanë qenë vetme në Gramsh dhe si ngjarje na shqetëson fakti se mund të ketë patur synim për të devijuar vëmendjen nga një skenar tjetër. Pra meriton ta shohim edhe në mënyrë të tërthortë. Kemi shumë struktura të tjera që përpunojnë çdo informacion, sidomos pas agresionit rus në Ukrainë. Ne jetojmë në një rajon delikat, rajoni i Ballkanit është kompleks, Shqipëria është kampion në Ballkan sa i përket qartësisë për orientimin e saj”, tha Peleshi.
Ministri Çuçi tha se “për nga rrethana se si kanë tentuar të hyjnë dhe për nga pajisjet që kishin dhe agresionit që kanë ushtruar ndaj ushtarëve, këta persona janë marrë nën hetim, i cili do të bëhet i plotë”. “Unë mendoj se për çdo të dhënë tjetër në lidhje me këta persona të ja lëmë hetimit që ta zbërthejë deri në fund skemën. Gjatë ditëve në vijim për elementë të rinj do të komunikojmë për publikun, për të dhënë panoramën e situatës nga pikëpamje e mënyrës se si kanë tentuar të hyjnë këta shtetas. Mendoj se s’ka vend për spekulime”, shtoi ai.
