Ndërhyrja e dhunshme e Inspektoriatit Kombëtar të Mbrojtjes së Territorit vijon edhe në gusht kur administrata është pushim.
Ky subjekt privat që operon prej 20 vitesh në zonën e rrugës dytësore Tiranë-Durrës ëhstë shembur edhe pse subjekti ishte në proces gjyqësor.
Inspektorët e IKMT-së mbërritën këtë të hënë, 22 gusht, në objektin në fjalë edhe pse kjo u kundërshtua nga avokati, por edhe vetë pronarët.
“Sot kemi depozituar një kërkesë për sigurimin e padisë që do shqyrtohet nga gjykata brenda 5 ditëve në lidhje me paligjshmërinë e veprimeve tuaja në nxjerrjen e këtij veprimi. Edhe sikur të ishit në kushtet e ligjshmërisë, siç e shihni vetë këtu do më shumë se një javë për të spostuar mallin.”
Sipas pronares së subjektit, çështja është dërguar në gjykatë. Po ashtu për subjektin në fjalë është pranuar sigurimi i provës.
“Nuk mi protokollojnë dokumentat. Kur bëra sigurimin e provës juristja tha nuk e kemi marrë vendimin. Ma ke sjellë me 11 gusht. Pse e ke mbajt tre muaj ti?”
Ata kanë kërkuar që shembjet të mos kryhen këtë të hënë për shkak se nuk i kanë lëvizur materialet që kapin vlera të larta monetare.
“1 milion e ca lekë dëm që i ka biznesi përveç dëmit që këta do të paguajnë nesër për sigurimin e provës që unë e kam siguruar me anë të Gjykatës Administrative dhe këta nuk pyesin. Ja ku e kemi vërtetimin e ri.”
Pavarësisht premtimit për të prekur vetëm objektin që ishte bosh, IKMT vijon me dhunë duke dëmtuar dhe gjithë biznesin.
Nuk është hera e parë që inspektorët nxitojnë për shembjen e këtyre objekteve, teksa dhe numri i proceseve gjyqësore ndaj këtyre veprimeve është rritur ndjeshëm./oranews
