Një 21-vjeçar shqiptar me shtetësi gjermane ka rrëmbyer ish të dashurën e tij 19-vjeçare. Referuar mediave gjermane, ngjarja ka ndodhur në Osnabruk. 21-vjeçari thuhet se e kishte tërhequr me forcë në rrugë, dhe më pas e kishte futur në makinë duke u larguar me shpejtësi.
Mediat gjermane theksojnë se kanë qenë miqtë e 19-vjeçares të cilët kanë lajmëruar menjëherë policinë, njofton albinfo.ch. Më tej theksohet se 21-vjeçari kishte si qëllim që ish-të dashurën e tij ta sillte në Shqipëri.
“Janë vizituar dhe marrë në pyetje dëshmitarët, të afërmit dhe personat e afërt dhe të kontaktuar nga i dyshuari dhe viktima”, tha policia e Osnabruk.
Ndërkohë, të shtunën vonë pasdite, 19-vjeçarja ka telefonuar nga Holanda dhe i ka treguar një dëshmitari se do të ktheheshin në Osnabruk. Por, në mbrëmje, efektivët gjetën mjetin që po kërkonin dhe arritën të arrestonin 21-vjeçarin, i cili ka heshtur gjatë kohës që është tentuar t’i merret dëshmia për ngjarjen.
19-vjeçarja ndodhej gjithashtu në makinë dhe sipas policisë ajo nuk kishte dëmtime fizike ose shenja dhune. Ish- i dashuri i saj akuzohet për heqje lirie, shtrëngim, lëndim të thjeshtë trupor dhe dyshohet se ka drejtuar mjetin pa patentë.
“Nuk kishte më arsye për ndalim, 21-vjeçari u lirua nga masat policore”, tha policia e Osnabrukut. 21-vjeçari u la i lirë, por mbetet në hetim dhe i është ndaluar nga policia që të kontaktojë sërish me ish të dashurën.
