Armando Broja nuk do të jetë i disponueshëm për Chelsea në takimin në transfertë kundër Leeds-t të dielën. Trajneri Thomas Tuchel ka treguar se sulmuesi i Shqipërisë ka një dëmtim, që e mban larg fushës. Por gjermani shtoi se 20-vjeçari ka një shans shumë të mirë që të tregojë veten e të sigurojë vendin e titullarit te “blutë” e Londrës.
I pyetur nga gazetarët nëse Armando Broja mund të jetë numri 9 që Tuchel po kërkon në ekip, apo duhet që të huazohet sërish gjermani u përgjigj: “Po edhe jo! Ne dimë mjaftueshëm për atë, por është një gjë që të performosh i huazuar dhe tjetër gjë që të luash me një klub si Chelsea. Ky është hapi i radhës. Ndërsa ai po i bën hapat e radhës, ai ishte dëmtuar në fazën parasezonale dhe është i dëmtuar edhe tani”.
Tekniku shtoi se sulmuesi kuqezi ka një shans të mirë që të tregojë veten në këtë sezon.
“Dëmtimi nuk ndihmon në ambicien e tij dhe në të pasurit e një ideje të qartë në atë çfarë ai mund të na japë ne, por nisur nga madhësia e ekipit momentalisht, ka një shans të madh për Armandon që të ketë impakt te Chelsea. E kuptoj që e ka ambicie, e ka objektiv të përparojë këtu. Nga ai varet! Mbështetjen e ka, ashtu si edhe besimin. Fatkeqësisht dëmtimi e ka penguar”.
Broja realizoi nëntë gola dhe dha një asist në 38 paraqitje me “Shenjtorët” sezonin e shkuar.
