Trajneri Xhovani Kolela ka disa ditë në krye të ekipit dhe tashmë i ka idetë më të qarta se në fillim në lidhje me formacionin që do të hedhë ndaj Egnatias.
Në portë me shumë mundësi do të luajë Teqja, i cili duket si portieri më në formë për momentin. Në mbrojtje Sota ka arritur të fitojë duelin me Menish dhe pritet të luajë titullar krah Bitrit. Për momentin në anën e majtë të difensivës eksperienca e Atanaskoskit ka fituar përballë energjisë së të riut Buxhelaj.
Hadroj pritet të luajë në të djathtë, teksa në këtë pozicion është provuar edhe i riu Zuna. Në mesfushë Telushi është në balotazh me Muratajn, teksa Rrapaj e Matondo pritet të jenë titullarë.
Hoti do të jetë pas dyshes së sulmit, që pritet të jetë Skuka-Cvetanoski. Blerjet e reja, Mensah dhe Da Silva, kërkojnë ende kohë, por nuk përjashtohet aktivizimi nga stoli.
