Babai i Florenc Çapjas, Fejzullah Çapja është shpallur në kërkim policor pasi në servisin e tij është gjetur një makinë e vjedhura bashkë me targa të vjedhura, fishekë dhe një kapele policie.
Ai akuzohet për veprat penale “Mbajtja pa leje e armëve, armëve shpërthyese dhe municionit”, “Mbajtja pa të drejtë e uniformës” dhe “Sigurimi i kushteve dhe i mjeteve materiale për të kryer vrasje”.
Kontrolli në servis për Florenc Çapjan
Burime zyrtare nga policia e Elbasanit bënë me dije këtë të Mërkurë se kanë ushtruar një kontroll në servisin e Fejzullah Çapjas. Qëllimi, sipas bluve, ishte kapja e djalit të tij Florenc Çapja, i cili ndodhet në kërkim policor.
Ky i fundit akuzohet për ekzekutimin e Gentian Beqirit dhe babait të tij në vitin 2012 në Elbasan. Çështja është nën gjykim nga Gjykata e Posaçme.
Makina dhe targat e vjedhura
Gjatë kontrollit në servis në lagjen “Emin Matraxhiu”, siç bën me dije policia e Elbasanit, u gjetën e sekuestruan një automjet i vjedhur, 2 targa të vjedhura, fishekë luftarakë dhe një kapele si e Policisë. Pronari i biznesit nuk u gjet nga blutë, por u shpall në kërkim.
“Gjatë kontrollit të ushtruar në servisin e babait të shtetasit të kërkuar, u gjetën dhe u sekuestruan në cilësinë e provës materiale, një automjet tip “Alfa Romeo”, pa targa, i cili rezulton i vjedhur në Kavajë, më datë 18.04.2019. Në vijim të kontrollit, në brendësi të automjetit u gjetën 2 targa, të cilat gjithashtu rezultojnë të vjedhura në Elbasan, më datë 29.06.2020, fishekë luftarakë dhe 1 aparat celular. Ndërsa në ambientet e servisit, shërbimet e Policisë gjetën një kapele me stemën e Policisë, si dhe një këllëf për mbajtjen e armëve të zjarrit.
Në përfundim të veprimeve u bë shpallja në kërkim e pronarit të servisit, shtetasit Fejzullah Çapja, për veprat penale ‘Mbajtja pa leje e armëve, armëve shpërthyese dhe municionit’, ‘Mbajtja pa të drejtë e uniformës’ dhe ‘Sigurimi i kushteve dhe i mjeteve materiale për të kryer vrasje’ dhe vijon puna nga ana e strukturave të Policisë, për lokalizimin dhe kapjen e 64-vjeçarit”, njofton policia.
Nën drejtimin e Prokurorisë pranë Gjykatës së Rrethit Gjyqësor Elbasan dhe SPAK, vijon puna për dokumentimin e veprave penale të grupeve kriminale, mbyllet njoftimi i bluve.
