Armando Broja nuk është stërvitur në dy ditët e fundit me Chelsean. Sulmuesi i kombëtares shqiptare u fut si zëvendësues nga Tuchel në dy duelet e para në kampionat kundër Evertonit dhe Tottenhamit.
Evertoni kërkon me insistim shërbimet e Brojës, të cilin po e tenton edhe Newcastle. Mediet angleze nuk raportojnë për ndonjë dëmtim të 20-vjeçarit shqiptar, kështu që mungesa e tij në stërvitje lidhet me një transferim diku tjetër.
Chelsea po garon të sigurojë Pierre-Emerick Aubameyang nga Barcelona.
Ardhja e kapitenit të Gabonit pritet të sjellë largimin e Brojës, i cili mund të vijojë karrierën në “St James Park”.
Sulmuesi i talentuar është një nga objektivat e Newcastle për repartin ofensiv, trajneri Eddie Howe e vlerëson shumë shtatlartin shqiptar dhe drejtuesit e “Qymyrxhinjve” po përgatisin një ofertë zyrtare.
Chelsea refuzoi 30 milionë paundë nga West Ham kohë më parë, ndërkohë që pritet me interesim të madh nëse “Blutë e Londrës” do të pranojnë shitjen apo huazimin e lojtarit shqiptar.
