Problem thelbësor e konsideroi kreu i PD-së, Sali Berisha, atë të edukimit dhe arsimimit. Gjatë një takimi me ekspertë të fushës, Berisha tha se kemi një rrokullisje në këtë drejtim, duke e lidhur këtë me rrokullisjen ekonomike të shqiptarëve dhe familjeve.
“Kemi një shpërfillje të figurës së mësuesve, që janë misionarët e edukimit. Kemi një ndryshim thelbësor të filozofisë së edukimit, është spostuar edukimi i bazuar në vlera dhe liri, dinjitet dhe atdhetari, me edukimin e nënshtrimit të bazuar në rregullat, në nënshtrimin, është vendosur një kontroll i turpshëm i mësuesit”, tha Berisha.
Sipas tij, është i papranueshëm trajtimi material i mësuesve, është i papranueshëm zëvendësimi i mësuesve të vërtetë me militantët e një partie, e cila është larguar publikisht dhe haptas, nga rregullat e lirisë duke u rikthyer te rregullat e origjinës.
Sipas tij, 90 % e shkollave nuk kanë ngrohje, madje edhe ato në Tiranë, pasi kreu i Bashkisë shpenzon 10 mln euro për dizinformimin e mediave, për furça të pseudo-personalitetit të tij, dhe nuk i shpenzon ato për ti siguruar ngrohje fëmijëve të Tiranës.
Berisha tha se 70 % e shkollave nuk kanë ujë të rrjedhshëm, ndërsa shtoi se në vend po mbyllen shkollat dhe po shtohen burgjet.
“Edukimi për PD është një proces madhor dhe thelbësor, ne e kemi dhe do e kemi procesin më serioz kur të jemi në qeverisjen e vendit”, tha Berisha.
