Aktorja Denise Dowse ka ndërruar jetë në moshën 64-vjeçare. Lajmin e trishtë e konfirmoi motra e saj.
Aktorja e “Beverly Hills, 90210” u shtrua në spital të dielën dhe e ka kaluar javën në gjendje kome duke luftuar meningjitin e rëndë.
“Dua ta shfrytëzoj këtë moment për të falënderuar miqtë dhe familjen për të gjithë dashurinë dhe lutjet. Është e dhimbshme të informoj të gjithë se motra ime, Denise Dowse ka vdekur. Denise Yvonne Dowse ishte motra më e mahnitshme, një aktore e përkryer, e shquar, mentore dhe regjisore. Ajo ishte shoqja ime më e mirë dhe anëtarja e fundit e familjes”, shkroi motra e aktores në postim.
Tracey iu drejtua edhe fansave të Denise: “Denise ju ka dashur shumë të gjithëve. E di që ajo po na vëzhgon me gjithë dashurinë që ka”.
Denise Dowse është e njohur për rolin e zonjës Teasley në dramën për adoleshencë “Beverly Hills, 90210”, dhe së fundmi ka portretizuar Dr. Rhonda Pine në “Insecure” të HBO. Ajo luajti në “The Guardian”, “Coach Carter” dhe shumë projekte të tjera filmike.
