Humbja e rëndë e Manchester United nga Brentford dhe fillimi i dobët i tyre në Premier League ka prekur edhe Cristiano Ronaldon, i cili thuhet se dëshiron të largohet nga klubi.
Një raport i ri i Sky Sports, në fakt i ka ‘hedhur benzinë’ zjarrit, duke thënë se Manchester United është i mërzitur me Ronaldon dhe madje e ka kërcënuar me ndërprerje të kontratës nëse nuk ndryshon sjelljen dhe performancën në fushë.
Megjithatë, pak minuta më vonë, rrjeti i njohur britanik e fshiu artikullin, duke ngritur pikëpyetje për vlefshmërinë e tij.
Më herët, sipas Sky Sports, drejtuesit e “Djajve të Kuq” po shqyrtonin një ndërprerje të parakohshme të kontratës së superyllit portugez (ajo skadon në vitin 2023 dhe ka një opsion për një vit tjetër). Megjithatë, ky mendim nuk do të realizohet nëse në periudhën e ardhshme CR7 ndryshon sjelljen e tij ndaj klubit.
Kujtojmë cse qëndrimi i CR7 në Mançester është kthyer në seri që nga fillimi i verës, kur për herë të parë shfaqi prirjen për t’u larguar. Superylli portugez dëshiron të garojë sërish në Ligën e Kampionëve por deri më tani nuk është gjetur asnjë skuadër që plotëson kërkesat e tij.
Në fakt, vetëm pak kohë më parë Interi dhe Milani refuzuan ta blejnë, ndërsa interesi i Atletico Madridit dhe riatdhesimi në Sporting të Lisbonës mbeti në… kartona.
