Megjithëse në fjalimin e tij të parë si President i Republikës, Bajram Begaj, nuk e përmendi në asnjë rrjesht Kosovën, duket se Kreu i Shtetit, nuk do të prishë traditat e vendosura deri më tani, ku vizitën e parë jashtë vendit ta bëjë në Republikën e Kosovës.
Njoftimi për vizitën e Begajt në Kosovë është bërë nga autoritetet kosovare, më saktë nga Kuvendi i Kosovës. Presidenti i Shqipërisë, Bajram Begaj, do ta vizitojë të hënën Kosovën.
“Agjenda e kryetarit Glauk Konjufca, për të hënën, 15 gusht 2022. Kryetari i Kuvendit të Republikës së Kosovës, Glauk Konjufca, pret në takim presidentin e Republikës së Shqipërisë, Bajram Begaj.
Media do të lejohen të marrin vetëm pamje në fillim të takimit”, thuhet në njoftim.
Në fillim të muajit gusht, Begaj ka zhvilluar një bisedë telefonike me Presidenten e Kosovës pas situatës së tensionuar në veri të Kosovës.
Begaj u shpreh se mbështet maturinë e autoriteteve të Kosovës dhe se realiteti i saj politik është i pakthyeshëm.
“Në bisedën telefonike me homologen Vjosa Osmani vlerësova maturinë e autoriteteve të Kosovës dhe partnerëve ndërkombëtarë, për shtyrjen e zbatimit të reciprocitetit me Serbinë për çështjet e dakordësuara më herët. Kosova është tashmë një realitet i pakthyeshëm politik, kontribues për paqen dhe stabilitetin në rajon dhe sovraniteti i saj mbetet i pacënueshëm”, shprehej Bajram Begaj.
