Hackerat që kryen sulmin kibernetik ndaj portaleve qeveritare në Shqipëri, përfshi këtu edhe e-albania apo adresën e e-mail të Kryeministrit Edi Rama, duket se kanë arritur të godasin e Ministrinë e Jashtme shqiptare.
“Homeland Justice” e njohur ndryshe si “Drejtësia e Atdheut”, ka publikuar sot disa qindra dokumente të hackuara nga Ministria e Jashtme, të cilat janë shkëmbim e-mailesh mes këtij institucioni dhe ambasadave shqiptare.
Në këto dokumente gjithashtu janë edhe e-mailet që emigrantët shqiptarë u kanë nisur ambasadave tona të akredituara në shtete e huaja, ku shumica janë kërkesë për pajisje me karta identiteti si dhe për prokura.
Nuk dihet ende, të paktën zyrtarisht nëse grupi i hackera-ve, për të cilët dyshohet se qëndrojnë pas Irani ose Rusia, kanë mundur të shtihen në dorë dokumente të konsideruara si sekret, apo deri në çfarë mase ato kanë mundur të futen në arkivat e shtetit shqiptar.
Dokumentet e publikuara deri më tani kanë të bëjnë me të dhënat personale apo disa e-mail të Kryeministrit Edi Rama, ku shfaqen ankesa qytetarësh, deputetësh, ish-deputetësh apo drejtuesish institucionesh. Gjithsesi është paralajmëruar se do të ketë surpriza në publikimin e të dhënave, edhe prej kohësh në aplikacionet e ndryshme janë publikuar pothuajse të gjitha të dhënat personale të qytetarëve, nga pagat e targat e makinave deri te pronat e tyre.
