Vijon të mbetet mister ngjarja tragjike në familjen shqiptare, e cila prej vitesh jetonte në New York, ku Florind Belliu dhe Ornela Shehi, u gjetën të pajetë në oborrin e një pallati, ndërsa kishin rënë nga kati i 6-të. Mediat kanë publikuar të dhëna dhe dëshmi, ku herë thuhet se bashkëshortët ranë menjëherë nga lartësia, ndërsa ka të tjera pohime se vajza ka rënë fillimisht dhe pak sekonda më pas edhe bashkëshorti i saj.
Media amerikane në një artikull të botuar sot mbi tragjedinë ka përmbledhur faktet, përfshi edhe njoftimin e policisë, reagimet e miqve e familjarëve, por edhe detaje mbi atë se çfarë mund të ketë ndodhur.
Artikulli i plotë për vdekjen e çiftit shqiptar:
Një aktor nga Shqipëria dhe bashkëshortja e tij kanë vdekur tragjikisht mëngjesin e së shtunës kur ranë nga kati i gjashtë i banesës së tyre në Bronx. Çifti u identifikua nga miqtë dhe fqinjët si Florind Belliu dhe Ornella Shehi.
Fqinjët thonë se kanë dëgjuar të bërtitura pak para rënies së çiftit dhe policia po heton ngjarjen fatale si pasojë tragjike e një debati të mundshëm mes çiftit.
Fëmijët e tyre të vegjël, 6 dhe 2 vjeç, ndodheshin brenda banesës në atë moment, ndërsa një fqinj kujton se kishte dëgjuar një fëmijë të bërtiste: “Mami! Mami!” pas rënies tragjike.
Sipas informacioneve, 28-vjeçarja Shehi dyshohet se ka rënë e para nga kati i gjashtë i pallatit me bashkëshortin e saj Belliu pas disa sekondash.
Burime policore kanë thënë për mediat se 35-vjeçari, më parë ishte tepër “i shqetësuar emocionalisht”. Madje, në muajin prill ishte zhdukur dhe policia e kishte gjetur.
Megjithatë, burimet thonë se policia nuk kishte marrë kurrë raporte për dhunë në familje që përfshinte çiftin, i cili u vendos në ndërtesë vetëm katër muaj më parë. Ata kanë dy djem, të cilët sipas fqinjëve ndodheshin në shtëpi në momentin e ngjarjes tragjike.
“Gjithmonë i shihja duke blerë gjëra për shtëpinë, ishin bashkë çdo ditë, me dy fëmijë, nuk e kuptuam që asgjë nuk shkonte”, ka thënë gruaja e menaxherit të ndërtesës.
Fqinjët i thanë mediave lokale se ata ishin një “çift i qetë”, por të premten Belliun nuk e kishin parë në gjendje të mirë.
Një fqinj tha për Beliun se ai nuk kishte një sjellje miqësore. “Kur ecje pranë tij, ai nuk kishte një sjellje miqësore, kështu që unë vazhdova. Ata ishin të mbyllur në vetvete dhe ishin shumë të izoluar”, u shpreh fqinji.
Një punonjëse nga një kafene aty pranë pranoi, duke thënë: “Ai nuk ishte kurrë në gjendje të mirë mendore. Ai erdhi për të pirë një kafe ose për të ngrënë dhe nuk ndërvepronte me pjesën tjetër të komunitetit. Gruaja nuk foli kurrë. Ajo ishte gjithmonë e qetë dhe e tërhequr, ata kishin edhe fëmijët e tyre.
Miqtë dhe familjarët po vajtojnë humbjen e çiftit në rrjetet sociale. “Pse vëlla, pse vëlla… ke zgjedhur këtë rrugë? Çfarë mungonte kur na kishit të gjithëve në krahë dhe ju mbështesnit? Çfarë ju bëri të merrni një rrugë pa fillim dhe pa fund?”, ka shkruar aktori shqiptar Andi Llabuti në komentin e tij .
“Çfarë do t’i themi nënës sate kur të na shohë në rrugë? Pse nuk menduat pak për familjen, nënën dhe motrat tuaja? Të gjithë i dinim aftësitë dhe vlerat që kishit, por kurrë këtë! Na ke trishtuar aq sa nuk ka shpjegim! Allahu ju mëshiroftë”, ka shkruar një tjetër.
Aktori i humorit shqiptarm Irgen Cela ka postuar një homazh në Instagram duke thënë se Belliu i theu zemrën.
“Nuk mund ta besoj që po e bëj këtë status për ty. Ti do të mbetesh në mendjen dhe zemrën time për të gjitha kujtimet e bukura që kemi së bashku dhe pasionin që ndamë për aktrimin. U prefshi në paqe te dy miku im i dashur dhe Zoti u dhente force te dy familjeve ne keto momente te veshtira.
