Prej orës 19:30, në Tiranë, përpara Ministrisë së Brendshme, po zhvillohet protesta e dytë nën moton “Drejtësi për Jonadën”, ndërsa kërkohet shkarkimi i Bledi Çuçit dhe Mirela Kumbaros, pas vrasjes tragjike të 7-vjeçares Jonada Avdiaj, e cila u godit për vdekje nga një skaf që drejtohej nga Komisari i Policisë, Arjan Tase.
Një prej pjesëmarresve në protestë, akuzoi presidentin Bajram Begajn, se sapo hyri në presidencë, mori pushimet.
“Keni dështuar me turizmin, por dështuar sepse u vra një vajzë 7 vjeçe, e vrau vartësi juaj. Ju që nuk kontrolloni dot vartësit tuaj, si mund të kontrolloni njerëzit.
Ju zoti kryeministër, ende pa u mbyllur plagët e familjes dhe shqiptarëve, dolët e thatë se ky ishte sezoni më i mirë. Ju kryeministër, duhet ti shkarkoni dy ministrat tuaj.
Për të mos folur për Presidentin e Republikës. Ai sapo hyri në presidencë, mori pushimet. Heshti, për humbjen e jetës nga një vajzë shqiptare.
Kësaj në Shkodër i thonë ‘me të vra e mos me të lënë me kja’, tha qytetarja.