Kreu i Këshillit Kombëtar të PD, deputeti Edi Paloka, përmes një postimi në rrjetet sociale, ka reaguar me nota ironike rreth asaj që mund të ndodhë pas publikimit të raportit të DASH, sipas të cilit korrupsioni në Shqipëri, ka një shtrirje endemike.
“Pas këtij raporti të DASH pritet të shpallet ”non grata” Mond Spaho që ka qenë ministër në qeverinë Berisha të ‘92-‘96”, shkruan me ironi Paloka, duke iu referuar ndoshta edhe shpalljes “non grata” të ish-Kryeministrit Sali Berisha, 8 vjet pasi ishte larguar nga pushteti.
Në raportin e DASH, Shqipëria klasifikohet si një vend i vështirë për të bërë biznes. Raporti më i fundit i Departamentit Amerikan të Shtetit për Klimën e Investimeve 2022, vlerëson se korrupsioni në Shqipëri është endemik, përfshirë në gjyqësor dhe prokurimet publike, konkurrencë e pandershme, ekonomi informale, ndryshimet e shpeshta të legjislacionit fiskal dhe zbatimin e dobët të kontratave si sfida të vazhdueshme për investimet dhe biznesin në Shqipëri.
Raportimet për korrupsion në prokurimet qeveritare janë të zakonshme. Sipas raportit, përdorimi i vazhdueshëm i kontratave të partneritetit publik privat (PPP) ka reduktuar mundësitë për konkurrencë, përfshirë nga investitorët e huaj, në infrastrukturë dhe sektorë të tjerë.
