UEFA ka vendosur që gjyqtari britanik Majkëll Oliver, do të jetë ai që do të drejtojë ndeshjen e Superkupës së Europës më datë 10 gusht, kur përballë do të vihen Real Madrid dhe Eintraht Frankfurt.
Gjyqtari anglez e ka këtë padyshim kulmin e karrierës së tij deri tani, një karrierë ku ai bëri famë në fakt me një ndeshje pikërisht të Real Madrid në Ligën e Kampioneve.
Protestat e Xhixhi Bufon te Juventusi në vitin 2018 për një ndeshje ndaj madrilenëvë ku Oliver dha penallti në minuat shtesë, me fjalët “kishte një bidon plehrash në vend të zemrës”, e shoqërojnë edhe sot e kësaj ditë gjyqtarin i cili po bën hapa në hierarkinë në UEFA dhe tashmë po i besohen sfida edhe më të rëndësishme.
Por në ndeshjen që luhet në Helsinki, përveç asistentëve angleze dhe atyre në sallën e VAR, Oliver do të ketë një ndihmë më shumë.
UEFA ka vendosur që ndeshja e Superkupës së Europës të shërbejë për të parë në veprim sistemin gjysmë-automatik të pozicionit jashtë loje.
Sistemi është testuar në aktivitetet e të rinjve dhe mendohet se do të bëjë më thjeshtë punën e asistentëve, të cilët do të marrin një përgjigje të menjëhershme nëse ka shkelje nga një lojtar. Sistemi në fjalë pritet që të aplikohet edhe në Katar 2022, ndërsa UEFA do ta përdorë duke filluar nga faza në grupe e edicionit të ardhshëm të Ligës së Kampioneve.
