Kreu demokrat, Sali Berisha, ka përshëndetur paralajmërimin që NATO i ka bërë Serbisë nëse rrezikohet Kosova. Berisha në rrjetet sociale shkruan se NATO ia ka bërë të qartë Putiinit dhe Vuçiçit që mos guxojnë, pasi nëse rrezikohet Kosova, do përballeni me fuqinë e NATO-s.
“Përshëndes këtë paralajmërim të Sekretarit të Përgjithshëm të NATO-s ndaj serbomadhit Vuçiç dhe padronit të tij Putin por edhe vasalëve të tij në rajon”, shkruan Berisha.
Postimi nga Berisha
Të dashur miq, Sekretari i Përgjithshëm i NATO-s, Jens Stoltenberg, ka zhvilluar një bisedë telefonike me presidentin e Serbisë, Aleksandar Vuçiç, ku ka biseduar pas ngjarjeve të fundit të ndodhura në veri të Kosovës.
Numri një i NATO-s ia ka bërë të qartë presidentit te Serbomadhisë Vuçiç dhe padronit të tij Putin të heqin dorë nga plani ruso-serb i destabilizimit të Ballkanit Perëndimor, se nëse do të cenohet stabiliteti i Kosovës, do përballen me fuqinë ushtarake të Aleancës së Atlantikut të Veriut.
Përshëndes këtë paralajmërim të Sekretarit të Përgjithshëm të NATO-s ndaj serbomadhit Vuçiç dhe padronit të tij Putin por edhe vasalëve të tij në rajon.
Thelbi i bisedës Stoltenberg- Vuçiç është bërë i ditur në Twitter nga Sekretari i Përgjithshëm i NATO-s Stotenberg në të cilin thuhet: “Të gjitha palët duhet të angazhohen në mënyrë konstruktive në bisedimet e ndërmjetësuara nga Bashkimi Evropian dhe të zgjidhin mospajtimet përmes diplomacisë. Misioni i NATO-s, KFOR-i, mbështetur në mandatin nga Kombet e Bashkuara, qëndron i gatshëm për të ndërhyrë nëse rrezikohet qëndrueshmëria”.
