Nga Boldnews.al
Arjan Tase, ish-shef i Komisariatit të Himarës, i gjykuar për lejimin e parcelave me kanabis, merr pafajësinë nga Apeli i Vlorës në fillim të vitit 2022 dhe rikthehet në fillim të këtij Gushti si pushues në qytezën bregdetare.
Merr një skaf lundrues, manovron në mënyrë të rrezikshme i pashqetësuar nga policët e zonës, të cilët dikur i ka pasur në varësi.
Xhiron “gomat” e mjetit lundrues, humbet drejtimin dhe godet në breg një të mitur 7-vjeçare, e cila gjen vdekjen e menjëhershme.
Kjo është historia me fund tragjik, shënuar mesditën e 2 Gushtit në Himarë.
Pas ngjarjes së dhimbshme, Agjencia e Mbikqyrjes Policore (AMP) deklaroi menjëherë se ka nisur hetimet për drejtuesin e mjetit, Tase, meqenëse ai tashmë është efektiv policie në Elbasan.
AMP premton, si përherë, që do të angazhohet maksimalisht për të zbardhur ngjarjen.
Në fakt, tragjedia e ndodhur sot është thjeshtë dhe vetëm një ngjarje e paralajmëruar.
Më herët, dy ngjarje të ngjashme, për fat pa viktima njerëzore, janë shënuar në Vlorë dhe Sarandë.
Policia kufitare, e cila është përgjegjëse për monitorimin e bregut, është, më së paku jashtë loje.
Në mesin e Korrikut, Policia Kufitare ndryshoi titullarin, nën ndikimin e fuqishëm të Ministrit të Brendshëm, Bledi Çuçi.
Ndryshimi në krye të Kufitares po rezulton një dështim i plotë.
Çuçi, në të vetmen dalje të kryer këtë verë për shqetësimet në Plazhe, ka përmendur zhurma akustike.
Mesa duket, ky është shqetësimi i vetëm i mbërritur në veshët e ministrit.
Drejtori i Përgjithshëm i Policisë, Gledis Nano, nga ana e tij, në fund të Korrikut lëshoi porositë e radhës për vartësit e tij, duke vendosur theksin tek siguria në Plazhe gjatë sezonit turistik.
Urdhërat e Nanos, me sa duket, nuk kanë mbërritur ende në zyrat dhe veshët e strukturave të varësisë.
Plazhet, nga Velipoja deri në Ksamil, janë nën tensionin e këtyre “piratëve të bregut”.
Në bregun e populluar të Durrësit, “mihalët” e plazheve, krahas rërës dhe shezlongeve, kanë përvetësuar edhe rripa deti, ku qarkullojnë vrullshëm skafe, jet-ski e motora uji.
Siguria në këto zona është minimale, pasi aty ku uturijnë mjetet ujore, gjenden edhe dhjetra e qindra fëmijë e familjarë pushues.
Askush nuk kryen kontrolle për patenta, për përdorim pijesh alkolike apo lëndë narkotike.
Thjesht, pushuesit e apasionuar pas shpejtësisë së madhe, paguajnë “mihalët”, marrin motorët e ujit dhe utërijnë në brigjet plot njerëz.
Askush nga autoritetet shtetërore nuk kryer verifikimet më minimale.
Policët që qarkullojnë brigjeve të detit kanë shqetësimin më të madh pastrimin e bregut nga ambulantët që shesin kokoshka.
