Policia e Tiranës ka finalizuar me sukses operacionin e koduar “Autostop”.
Efektivët kanë kapur në flagrancë disa shtetas duke shkëmbyer lëndë narkotike, duke arrestuar njërin prej tyre. Ndërsa, dy të tjerë janë proceduar penalisht.
Njoftimi i policisë:
Finalizohet me sukses operacioni policor i koduar “Autostop”, për goditjen e veprimtarisë kriminale në fushën e narkotikëve. Operacioni, i zhvilluar nga Sektori për Hetimin e Narkotikëve dhe Trafiqeve të Paligjshme në DVP Tiranë.
Vihet në pranga 1 shtetas, procedohen penalisht në gjendje të lirë 2 të tjerë. Sekuestrohen 3 kg e 400 gramë lëndë e dyshuar narkotike cannabis sativa.
Specialistët e Sektorit të Hetimit të Narkotikëve dhe Trafiqeve të Paligjshme, në vijim të punës për goditjen e aktivitetit kriminal në fushën e prodhimit dhe shpërndarjes së lëndëve narkotike, pas një pune të mirëfilltë hetimore, bazuar dhe në të dhënat e grumbulluara në rrugë operative, se një shtetas posedonte dhe shpërndante lëndë narkotike në zona të ndryshme të qytetit të Tiranës, organizuan dhe finalizuan me sukses operacionin policor të koduar ”Autostop”.
Si rezultat i këtij operacioni u bë kapja dhe arrestimi në flagrancë i shtetasit:
– I. L., 25 vjeç, banues në Tiranë, për veprën penale “Prodhimi dhe shitja e narkotikëve”;
Gjithashtu u proceduan penalisht në gjendje të lirë shtetasit:
- K.A., 22 vjeç, banues në Tiranë, për veprën penale “Prodhimi dhe shitja e narkotikëve”;
- C.D., 20 vjeçe, banuese në Tiranë, për veprën penale “Moskallëzimi i krimit”.
Shërbimet e Policisë kanë lokalizuar mbrëmjen e djeshme, në rrugën “Ali Demi”, automjetin me drejtues shtetasin I. L. dhe pasagjere shtetasen C. D. Shtetasi I . L., pasi ka ndaluar automjetin, i ka dhënë nga dritarja, shtetasit K. A., një sasi lënde të dyshuar narkotike, e cila u sekuestrua në cilësinë e provës materiale.
Në vijim të veprimeve, gjatë kontrollit në banesën e shtetasit I. L., shërbimet e Policisë kanë gjetur dhe sekuestruar në cilësinë e provës materiale 3.4 kg lëndë të dyshuar narkotike cannabis sativa.
Vijojnë veprimet hetimore për dokumentimin e plotë të veprimtarisë kriminale të shtetasit I. L.
Materialet i kaluan Prokurorisë, për veprime të mëtejshme.
