Agjencia e Mbikëqyrjes Policore ka njoftuar se ka nisur hetimet për ngjarjen e rëndë të ndodhur sot në plazhin e Potamit, ku efektivi që punon në Komisariatin e Elbasanit aktualisht, akuzohet se ka goditur për vdekje me skaf një fëmijë në breg të detit.
Ngjarja e rëndë ka ndodhur para syve të familjes të vogëlushes dhe personave të tjerë, të pranishëm në plazh.
Reagimi nga Agjencia e Mbikëqyrjes Policore:
Pas marrjes dijeni të ngjarjes së rëndë të ndodhur në plazhin e Potamit, ku shtetasi A. T., me gradën Komisar dhe me detyrë Shef i Seksionit të Policimit në Komunitet në Komisariatin e Policisë Elbasan, ka goditur për vdekje një fëmijë 5 vjeç ndërsa drejtonte një mjet lundrues, Agjencia e Mbikëqyrjes Policore nën drejtimin e Prokurorisë së Rrethit Gjyqësor Vlorë ka ngritur menjëherë një grup të posaçëm hetimor për hetimin dhe zbardhjen e plotë të kësaj ngjarje.
Aktualisht, shtetasi A. T. ndodhet i shoqëruar në Komisariatin e Policisë Himarë.
