Nga Boldnews.al
“Një në çdo dy makina që është regjistruar në Tiranë ka gjoba të Policisë Bashkiake të Tiranës”. Konstatimi është bërë nga efektivë të Policisë Rrugore, të cilët qendrojnë mjetet për shkelje apo për “gjoba të papaguara”. Por, masiviteti dhe gjobëvënia, ka kapërcyer çdo kufi.
Tashmë, vëmendja e “vartësve” të Veliajt është të gjobisin qytetarët, madje edhe me “gabimin” më të vogël. Gjithçka është kthyer në një “gjobëvënie” të madhe, pasi Policia Bashkiake e Tiranës ka marrë atributet edhe të Policisë Rrugore apo të Rendit. Në çdo rrugicë, lagje apo pallat, sheh automjete të gjobitura, ndërsa gjithçka është e organizuar.
Por, më e rëndë është se gjobat vendosen pa asnjë të dhënë, me gabime trashanike apo me llotari. Këto konstatime nuk i ka bërë redaksia e BoldNews.al, por vetë Policia e Shtetit. Në një dokument të publikuar në Agjencinë e Prokurimit Publik, policia shkruan se akses në sistemin e-gjoba ka Policia Bashkiake, por gjobat janë me gabime!
Sipas dokumenteve që disponon BoldNews.al, AKSHI ka finalizuar tenderin me objekt “përmirësimi i sistemit e-gjoba, integrimi me pajisjet mbështetëse radar, dhe plotësimi me tableta për Policinë e Shtetit”. Tenderi është për Drejtorinë e Përgjithshme të Policisë së Shtetit, ndërsa kohëzgjatja është 12 muaj implementim dhe 24 muaj mirëmbajtje. Tenderi është fituar nga bashkimi i operatorëve ekonomik “S&T ALBANIA”, “Image & Communications Development”, me ofertë 327.963.170 lekë pa TVSH.
Në kulmin e mosfunksionimit të E-Albania, drejtoresha Mirlinda Karçanaj, ka finalizuar këtë tender me një vlerë të lartë. Në dokumentet shoqëruese, AKSHI, duke iu referuar Policisë së Shtetit, shkruan se prej vitit 2012, Policia e Shtetit ka në përdorim një sistem për menaxhimin e kundravajtjeve të Kodit Rrugor dhe prej gjysmës së parë të vitit 2019, 250 agjentë të Policisë Rrugore janë pajisur me kompjutera mobile dhe printera portative, për vendosjen e gjobës elektronike. “Në vitin 2020-2021 janë në përdorim dhe 6 pajisje të matjes së shpejtësisë së mjeteve (radare). Synohet vazhdimi i procesit të digjitalizimit, duke pajisur më shumë oficerë policie me pajisjet e nevojshme, duke pajisur supervizorët me pajisje të veçantë tablet për ndjekjen e punës” thuhet në këtë dokument.
Sipas tij, me ndryshimin e Kodit Rrugor, agjenti i policisë rrugore merr të drejtën e aplikimit të heqjes së pikëve në patentë, të pezullimit të lejes së drejtimit apo lejes së qarkullimit.
Në dokumentet shoqëruese, shkruhet se përveç 250 agjentëve të pajisur me kompjuter mobile dhe printer portativ, agjentët e tjerë të Policisë Rrugore, verbalizimin e kundravajtjeve e kryejnë në mënyrë fizike, përmes një blloku. Por, detaji më i veçantë në këto dokumente është konstatimi për “gjobëvënien” e Policisë Bashkiake të Tiranës.
“Akses në sistemin e-gjoba deri tani ka vetëm Bashkia e Tiranës. Të gjitha kundravajtjet rrugore që rregjistron kjo bashki reflektohen në sistemin e-gjoba dhe rrjedhimisht janë të aksesueshme për punonjësit e Policisë Rrugore, nëpërmjet pajisjes tablet. Ky lloj aksesi që i është mundësuar Bashkisë Tiranë ka shumë të meta, si nga aksesi i të dhënave duke i mundësuar Bashkisë Tiranë akses dhe tek të dhënat e gjobave të Policisë së Shtetit si dhe tek menaxhimi i informacionit” shkruhet në dokument.
Pra, mjaft e qartë, pasi “gjobëvënësit” e Veliajt, të veshur me uniform, mbushin çdo ditë mijëra fatura fiktive të gjobave. Ja si vijon dokumenti; “Policia e Shtetit është e detyruar të suportojë Bashkinë Tiranë, ndërmjet sektorëve përkatës, në menaxhimin e përdoruesave dhe korrigjimin e të dhënave në procesverbalet e Bashkisë”.
Një institucion shtetëror, siç është Policia e Shtetit, konstaton se gjobat e Policisë Bashkiake kanë të meta, duhen korrigjuar, duke faktuar në këtë mënyrë ankesën e mijëra banorëve të Tiranës që ankohen se iu është vënë gjobë pa pasur shkelje! Një skemë e pastër e gjobëvënies, por që askush nuk merr përgjegjësi, pasi mbrohen me fanatizëm nga Lali Eri. Të jetë i paprekshëm?!
