Depozitat bankare iu rikthyen rritjes me ritme të larta në qershor, për herë të parë që nga fillimi i vitit. Sipas statistikave të Bankës së Shqipërisë, muajin e kaluar , bizneset, qytetarët dhe institucionet e tjera depozituan 10.3 miliardë euro, duke shënuar një rekord të ri krahasuar me të njëjtën periudhë të një viti më pare, ku stoku i depozitave arriti në 9.7miliardë euro.
Rritja në qershor ka ardhur si nga depozitat në lekë, ashtu edhe ato në valutë, ndërsa rekord, krahasuar me mesvitin e 2021-it, shënuan ato në monedhën europiane, në vlerën e 5.7 miliardëve. Vetëm në një muaj, totali i depozitave në këtë monedhë u shtua me 101 milionë, shifra më e lartë që nga gushti i kaluar.
Rritja e depozitave në Euro u përqendrua kryesisht në llogari dhe depozita pa afat, për shkak të normave të ulëta të interesit.
Shifrat dëshmojnë për prurje dhe ofertë të lartë të Euros në ekonominë shqiptare, që reflektohet edhe në zhvlerësimin e saj me lekun. Nga faktorët e dukshëm dhe të matshëm është ardhja e turistëve që sipas INSTAT në 6 muajt e parë arritën në 2.5 milionë.
Ndikim tjetër mund të ketë edhe euroizimi i lartë i ekonomisë së brendshme dhe fakti që asetet në vlerë të madhe, duke filluar nga pronat, përgjithësisht kuotohen dhe tregtohen në Euro.
