Ilir Meta teksa mblodhi Komitetin Organizativ të Partisë së Lirisë tha se përfaqësuesit e saj kanë tre detyra.
“Revolucioni antikorrupsion, organizimi i Partisë së Lirisë duke u hapur dhe jo duke u shqetësuar kush po vjen dhe e treta qeverisja e vendit, përgatitja”, u shpreh Meta. “Dy të parat do të jenë detyrat kryesore“, theksoi ai.
Ish-Presidenti u shpreh se revolucioni anti-korrupsion do të vendosë një herë e mirë lirinë. Më tej, shtoi se duhet ecur me një ritëm më të shpejtë në luftën me korrupsion. Në krye të plaçkitjes së vendit, sipas Metës, është Edi Rama.
“Një vjedhës i pamëshirshëm që vjedh çdo gjë”, u shpreh Meta.
Ish-kreu i shtetit u shpreh se Beteja e “Stalingradit” për të shpëtuar Shqipërinë ka filluar.
“Kjo është një betejë për lirinë e çdo shqiptari. Garancia e vetme është Referendumi”, tha Meta. “Do ju marrim pushtetin hajduteve, do t’i çojmë në burg dhe do t’ju merren të gjitha lekët që kanë vjedhur”, shtoi ai.
Akuza pati edhe për ish-kreun e PD-së Lulzim Basha, që sipas tij ishte i shitur tek pushteti.
“Referendumi do të ketë disa etapa”, shpjegoi Meta.
“Etapa e parë është ndërgjegjësimi se kjo është betejë e Stalingradit. Shqipëria duhet të ishte bërë anëtare e BE me kohë. Nuk kemi asnjë betejë me vendet e rajonit, e kemi vetëm në drejtimin, që duke qenë popull pro-europian, duam të ecim më shpejt se të tjerët, jo të mbetemi të fundit në klasë. Nëse ndodh ashtu, nuk mbetet njeri në Shqipëri, na ikin të gjithë. Faza e dytë është mobilizimi i lëvizjes qytetare. Është e vështirë të gjesh një institucion në Shqipëri që nuk kryen falsifikime. Revolucioni antikorrupsion është për triumfin e lirisë. Këta duan edhe të vjedhin edhe të duartrokiten. Shpresoj dhe nxis drejtësinë të veprojë. Nëse nuk do të ketë reflektim, do të përfundojë me ndërhyrjen e popullit ndaj zyrtarëve të korruptuar”, tha Meta.
“Korrupsioni është armiku më i madhi lirisë sonë. Me korrupsion u ble opozita, heshtja jonë, janë blerë shokët dhe shoqet tuaja. Janë blerë dhe mbahen me presion mediat. Duan të vjedhin akoma më shumë, duan edhe të vjedhin edhe të duartrokiten nga të gjithë shqiptarët. Përpara se të kalojmë në disa vendime organizative, ju kërkoj mobilizim total. Për mua nuk ka pushime. 25 korrikun e kam pritur që në datën 26 prill në mëngjes. Jo se nuk e dija se çfarë do ndodhte. Edhe gjatë kësaj kohe i kam shërbyer ringjalljes së demokracisë”, shtoi ai.
“Unë jam i sigurtë që ky revolucion paqësor me mimoza nëse nuk do të ketë reflektim do të përfundojë me ndërhyrjen e popullit ndaj zyrtarëve e qeveritarëve të korruptuar. Keni vërejtje?! Keni dyshim se unë dal i pari në këtë betejë?! Prandaj u thoni të gjithë shqiptarëve se beteja e Stalingradit për të shpëtuar të ardhmen e Shqipërisë në luftën kundër kancerit që shpopullon dhe vjedh shqiptarët dhe mbështetet për të dekualifikuar shqiptarët në nivel rajonal ka marrë fund një herë e përgjithmonë”, përfundoi Ilir Meta.
