Ilir Meta në studion e emisionin “Open” tha mbrëmjen e sotme se frymëzimin për ndryshimin e emrit nga LSI në Partia e Lirisë e kishte marrë nga “Populli i 2 Marsit”.
Meta tha se nuk është qëllimi për të bërë një parti e re politike, pasi partinë e kishim, por për të krijuar një frymë të re, një frymë që qytetarët të marrin në dorë fatet e vendit dhe mos presin nga Ilir Meta apo kushdo lider tjetër.
“Ne jemi partia e referendumit, pasi kjo e drejtë e qytetarëve ka 25 vite që nuk zbatohet”, tha Ilir Meta. Ai shtoi se përballë kemi një mafie, të cilën mund ta rrëzojmë përmes referendumit.
“Ky është një mekanizëm që të mbajmë nën kontroll klasën politike. Ne do të jemi shumica në këtë vend, zgjedhjet e ardhshme, qoftë edhe në 2025, megjithëse kam bindjen që do të jenë më shpejt, ne do të fitojmë”, tha Meta.
Ai shtoi se sistemi ka dalë jashtë kontrollit dhe jemi në kushtet e një partie shtet, ku vetëm një person i vetëm kontrollon gjithçka.
“E quajta Partia e Lirisë sepse këtu është cënuar liria. Janë shkelur të drejtat e qytetarëve. Kjo është një frymëzim që vjen nga populli i 2 marsit.
Kjo forcë e re, përfshirë LSI-në e deritanishme dhe forcat e reja që duantë të gjejnë veten, janë frymëzuar nga populli i 2 marsit.
Përgjegjësia ime do të jetë për të organizuar brenda 2 muajsh Konventën përmbledhëse të ish-LSI, mendoj se jemi në një situatë krejt tjetër të rrethanave historike.
LSI e përfundoi misionin e saj për të zhbllokuar integrimin, çka e arriti përmes rrotacionit në 2005, pasi qeveria Nano po mbante peng Stabilizim Asociimit, atëherë e bëjmë para Serbisë e Malit të Zi.
Është e tmerrshme për popullin tonë dhe mua që ka 10 vite që Mali i Zi ka çelur negociatat dhe Shqipëria pati një çelje formale dhe do të jetë e vështirë të ecim”, tha Meta.
