Blendi Gonxhja, Drejtori i Drejtorisë së Përgjithshme të Transportit Rrugor është paraqitur sot në ambientet e SPAK.
Nuk dihen arsyet e paraqitjes të Gonxhes në Strukturën Antikorrupsion dhe nëse thirrja e tij nga prokuroria ka lidhje me akuzat e depozituara ndaj tij më herët në këtë institucion.
Blendi Gonxhe është kallëzuar në SPAK rreth dy vite më parë nga “Nisma Thurrje” për veprat penale, shpërdorim detyre dhe ushtrim i ndikimit të paligjshëm e prishje të pabarazisë në tendera.
Një prej aktivistëve të “Nisma Thurrje” sqaroi pas depozitimit të padisë se, Blendi Gonxhe, gjatë detyrave si kreu i Agjencisë së Parqeve dhe Rekreacionit në Bashkinë e Tiranës si dhe Drejtori i Transportit Rrugor, ka përfituar para publike nga taksat e shqiptarëve në mënyrë të paligjshme.
Gonxe akuzohet për përfitim tenderash në kundërshtim me ligjim përmes dy kompanive: “ALBARENT” SHPK, që sipas të dhënave në Qendrën Kombëtare të Biznesit është në pronësi të tij dhe “ATD”. Kjo e fundit, sipas “Nisma Thurrje”, është një kompani koperturë pas të cilës fshihet zyrtari i lartë.
Një prej përfaqësuese të “Nisma Thurrje” foli për skemën e përdorur nga Gonxhe “në përfitimin e parave publike në mënyrë të paligjshme”.
“Sot i kemi paraqitur prokurorisë së Posaçme Anti-korrupsion fakte dhe prova në lidhje me implikimin dhe shkeljen e ligjit që zoti Blendi Gonxhe ka bërë duke qenë nën detyrat e drejtorit të agjencisë së parqeve dhe rekreacionit në detyrën e drejtorit të Përgjithshëm të Transportit Rrugor. Duhet thënë se gjatë kohës menjëherë pas marrjes së detyrave shtetërore nga zoti Gonxhe, kompanisë së tij, të lidhura me të apo partnere, i kanë vërshuar para lumë nga buxheti i shtetit. Vetëm në 5 vitet e fundit, kompanisë “Albarent”, e cila operon po në fushën e transportit, që është në pronësi të z. Gonxhe, ka përfituar nga buxheti i shtetit rreth 200 milionë Lekë. Para këto nga taksat tona që kanë shkuar drejtpërdrejtë në xhepin e zotit Gonxhe. Po ashtu, ekziston dyshimi i arsyeshëm se zoti Gonxhe, këto para i ka përfituar duke ushtruar ndikimin e vet të paligjshëm i funksionar i lartë shtetëror”, tha ai.
“Nga ana tjetër, kompania ATD, një kompani partnere e kompanisë ALbarent ka përfituar në gjashtë vitet e fundit rreth 6 milionë euro nga buxheti i shtetit. Ekziston dyshimi i arsyeshëm nga lidhjet e faktuara dhe të paraqitura para SPAK midis dy kompanive “Albarent” dhe “ATD” se, kompania “ATD” është një kompani koperturë e përdorur nga zoti Gonxhja për ti përfituar vetë paratë publike dhe fondet që kompania “ATD” ka përfituar gjatë këtyre viteve. Skandali shkon edhe më tej kur 400 milionë Lekë nga 600 milionë euro që u përfituan nga kompania ATD, janë akorduar gjatë kohës që z.Gonxhe ka qenë drejtor i Agjencisë së Parqeve dhe Rekreacionit po me firmën e tij”, shtoi.
