Nga Boldnews.al
Disa muaj më parë, Policia e Tiranës njoftoi se kishte finalizuar operacionin “përfitimi”, teksa u arrestua Sokol Topçiu, pronari i firmës farmaceutike “FarmaNet”. Kjo e fundit ka përfituar dhjetëra miliona euro me tendera sekretë apo emergjentë për Covid 19, por që u faktua se kishte bërë kontrabandë.
Por, 9 muaj më pas, një institucion shtetëror, njofton se këtë firmë e ka shpallur fituese të një tenderi 550 mijë euro. Pra, për aq kohë sa nevojitet për ngjizjen dhe lindjen e një fëmije, firma “FamraNet” ia ka arritur që të pastrojë emrin, madje nuk ka asnjë informacion se çfarë ka ndodhur me hetimet apo gjykimet e kësaj çështje. Por, fakt është se, në vend që të përjashtohej apo të merreshin masa ekonomike, kjo firmë fiton sërish para publike! Një paradoks i madh, pavarësisht skandaleve të njëpasnjëshme të kësaj firme, apo të pronarit të saj, z.Sokol Topçiu.
Sipas dokumenteve që disponon BoldNews.al, Drejtoria e Përgjithshme e Burgjeve, e drejtuar prej disa muajsh nga Admir Abrija, ka shpallur fituese firmën “FARMA NET ALBANIA” për një tender të hapur mbi kufirin e lartë monetary. Në dokumente thuhet se kontrata është “blerje medikamente”, ndërsa afati i ekzekutimit brenda afatit 24 muaj nga data e nëshkrimit të MK nga palët. Burgjet kanë vendosur disa klauzola si “me kohëzgjatje lëvrimi të mallit 45 ditë nga data e nënshkrimit të kontratës, ku 50% e mallit të dorëzohet brënda 20 ditëve”.
Në të njëjtin dokument shkruhet se “në këtë procedurë kanë marrë pjesë ofertuesit; ‘FARMA NET ALBANIA’ me vlerë 55.336.661 lekë pa TVSH. Dhe, ‘INCOMED’ me vlerë të ofruar 0 lekë!”. Pra, një tender fiktiv, pasi firma e dytë ka ofruar 0 lekë. Dy janë mundësitë, ose specifikimet e burgjeve s’kualifikonin firmën e dytë ose I ka hapur rrugë Topçiut që të fitonte këtë tender.
Disa muaj më parë, Policia e Shtetit, do të njoftonte finalizimin e operacionit “Përfitimi”, ku në pranga ra administrator i një rrjeti farmaceutik, në kuadër të hetimeve lidhur me tregtimin e ilaçeve kontrabandë.
I arrestuari ishte Sokol Topçiu, pronari i FarmaNet, një nga bizneset farmaceutike që ka përfituar miliona euro nga Ministria e Shëndetësisë përmes tenderave. “Topçiu, 57 vjeç akuzohet se ka shitur mijëra ilaçe kontrabandë gjatë periudhës së pandemisë. Ilaçet që u shitën në treg me çmim shumë herë më të lartë se sa u blenë janë: ‘inhixa, clexane, favira, alphagan, cyrotex, aricept, medro, co aprovel.’ Dyshohet se këto ilaçe u sollën në Shqipëri me 20 dollarë dhe disa prej tyre u shitën deri në 500 mijë lekë të vjetra” denoncoi BoldNews.al në atë kohë. Mësohet se të gjitha medikamentet që futeshin pa u regjistruar kryesisht përdoreshin për trajtimin e Covid-19.
Hetimi zgjati rreth 1 vit, ndërsa prokuroria kërkoi ‘arrest me burg’, por Gjykata vendosi t’i lërë në arrest shtëpie personat e identifikuar si: Blerim Bitri, 40 vjeç, administrator i një farmacie; Florian Marku, 39 vjeç, administrator i një farmacie; Margarita Xhaxhiu, 64 vjeçe, e dyshuar si dërguesja e mallrave kontrabandë; Jani Papuli, 66 vjeç, i punësuar nga Margarita Xhaxhiu; Florian Lila, 40 vjeç, administrator i një farmacie; Bashkim Osmani, 56 vjeç, administrator i një depoje farmaceutike.
