I vuri zjarrin tokës së tij, për pasojë u dogjën sipërfaqe toke me ullinj, në pronësi të personave të tjerë. Kjo i ka ndodhur dje Idriz Sinanit, 50 vjeç në Lushnje, i cili duke dashur të pastrojë tokën e tij me zjarr, ka djegur disa sipërfaqe me ullinj.
Policia thotë se ka nisur procedimi penal ndaj Sinanit. Gjithashtu policia kërkon nga qytetarët që të denoncojnë çdo zjarrvënie, duke garantuar anonimatin për njoftimin.
Njoftimi i Policisë së Lushnjes:
Në vijim të punës hetimore për identifikimin dhe vënien përpara përgjegjësisë ligjore të autorëve të zjarrvënieve të qëllimshme apo nga pakujdesia, specialistët për Hetimin e Krimeve në Komisariatin e Policisë Lushnjë referuan materialet në Prokurori dhe nisi procedimi penal në gjendje të lirë për shtetasin I. S., 50 vjeç, banues në Karbunarë, Lushnjë, pasi ka ndezur zjarr për djegien e barërave në tokën e tij dhe si pasojë e përhapjes së flakëve është djegur një sipërfaqe toke me ullinj, në pronësi të shtetasve E. M. dhe P. M.
Materialet i kaluan Prokurorisë, për veprime të mëtejshme.
Drejtoria Vendore e Policisë Fier apelon për të gjithë banorët, që në asnjë rast mos shkaktojnë zjarrvënie, sepse do të përballen me ligjin. Policia fton qytetarët që të denoncojnë në numrin 112 dhe në Komisariatin Dixhital, çdo rast të zjarrvënies apo të paligjshmërisë në tërësi, duke iu garantuar anonimatin dhe reagim të shpejtë e të paanshëm nga strukturat policore.
