Dy ditë më parë në qendër të qytetit të Laçit u ekzekutua me breshëri kallashnikovi 28-vjeçari Klisman Preçi, ndërkohë që mbeti i plagosur rëndë 47-vjeçari Ylli Brahimi.
Nga hetimet e deritanishme rezulton se ndaj tyre është qëlluar me të paktën 108 plumba, pasi policia gjeti në vendin e ngjarjes po aq gëzhoja. Ndërkohë që nga policia janë shoqëruar 12 persona që mund të kenë dijeni lidhur me atentatin, ndërsa janë kontrolluar 8 ambiente.
Nga raportimet mësohet se gjithashtu janë sekuestruar kamerat e sigurisë jo vetëm në zonën ku ndodhi atentati, por edhe përgjatë segmentit rrugor nga ku mendohet se kanë kaluar autorët.
Për hetimin e ngjarjes, policia ka ngritur një grup të posaçëm hetimor, nën drejtimin e prokurorit, ku po aplikohen e përdoren teknikat dhe metodat speciale te hetimit.
Ngjarja e së premtes po hetohet bashkë me atë të ndodhur 1 javë më parë në Fushë Krujë, ku u ekzekua Brilant Martinaj dhe dy miqtë e tij. Shkak i hetimeve të përbashkëta për të dy ngjarjet është lidhja ose njohjet që kishin viktimat mes tyre, që të gjithë konsiderohen si miq apo njohje të Ervis Martinaj, i shpallur në kërkim nga SPAK, pas dëshmive të të penduarit Nuredin Dumani.
Referuar të dhënave të raportuara mendohet se ekzekutimi i 3 të rinjve në Fushë Krujë të dielën e kaluar dhe atentati i ndodhur në Laç, ku mbeti viktimë një tjetër i ri dhe u plagos 47-vjeçari Brahimi, janë krzer nga i njëjti grup. Grupi hetimor ka dalë në konkluzionet se dy ngjarjet kanë disa të përbashkëta, që nga numri i plumbave të qitura nga armët, në Fushë krujë rreth 100 dhe në Laç 108, skenari i përdorur ku autorët pasi kryejnë krimin largohen drejt të njëjtit aks rrugor ku djegin automjetin, si dhe lidhjet që kanë viktimatmes tyre.
