Policia rrethoi që herët Gjykatën e Fierit, ndërsa togat e zeza vendosën nisjen e procesit gjyqsor ndaj Klodian Çalamanit, 38-vjeçarit që nëntorin e vitit të kaluar vrau 8-vjecarin Mateo Vasiu.
Frika se familjarët mund të përsërisnin skenarin e 18 Nëntorit të vitit të kaluar, kur gjatë masës së sigurisë u futën me forcë në gjykatë, detyroi masat të shtuara sigurie.
Por as Klodian Çalamani dhe as familjarët e 8 vjecarit Mateo Vasiu nuk u paraqitën në Gjykatë duke u përfaqësuar me avokatë.
Me dyer të mbyllura, Gjyqtarja Erlanda Agaj pranoi kërkesën e prokurorisë për nisjen e procesit gjyqsor ndaj vrasësit të fëmijës.
Klodian Çalamani do të përballet me akuzat “Marrëdhënie seksuale ose homoseksuale me të mitur me dhunë” dhe “Vrasja në rrethana të tjera cilësuese ndaj të miturit”.
Krimi që tronditi vendin u shënua me 16 Nëntor të vitit të kaluar në Grecalli të Fierit.
Klodian Çalamani e tërhoqi fëmijën brenda banesës përballë shtëpisë së tij dhe aty, sipas prokurorisë, e abuzoi seksualisht para se ta vriste me sende të forta.
Trupi i 8-vjeçarit u gjet i groposur në oborr, ndërsa vrasësi duke pirë raki.
Vrasja e fëmijës shkaktoi reagime të ashpra dhe ndërsa familjarët e tij nisën një peticion për rikthimin e dënimit me vdekje.
