Një bandë shqiptaro-tuniziane e trafikut e heroinës u shkatërrua nga autoritetet italiane. Mësohet se ata rafinuan ‘6-Mam’, një opioid që përmban një përqendrim të lartë të monoacetilmorfinës. Mjaft i fuqishëm për t’u quajtur një “vrasës i heroinës”.
Operacioni u quajt ” Bavaria 2021 ” dhe zbuloi “një grup kriminal të mirëorganizuar me origjinë jashtë BE-së”, që merrej me prodhimin e drogës, e cila më pas paketohej dhe shitej.
Droga e prodhuar përmbante 6 mmonoacetilmorfinë, që është “një substancë që rrjedh nga morfina dhe shumë e ngjashme me heroinën, por me efekte më të shpejta dhe më të rënda pasi përftohet duke shtuar një sasi të tepërt të acidit klorhidrik, që ka rrezik për shëndetin.
Mediat italiane bëjnë me dije se të arrestuarit janë të moshave 31-41 vjeç. Një prej shqiptarëve të arrestuar u kap sapo zbriti nga aeroporti i Veronas, pasi kishte udhëtuar nga Rinasi.
Këto arrestime janë bërë në kuadër të operacionit të mëparshëm të kryer në shtator të vitit 2021 ndaj grupeve kriminale në zonë ku u sekuestruan disa kilogramë heroinë, marijuanë dhe materiale të tjera të nevojshme për ndarjen, peshimin dhe paketimin e drogës.
Gjithçka nisi në shtator të 2021, ndërkohë shqiptarët kishin filluar të bënin shumë kujdes duke përdorur kanale të tjera komunikimi si edhe kode mes tyre.
Nga përgjimet e policisë, kjo e fundit ka konstatuar gjuhën e koduar. Bëhet e ditur se kur donin të flisnin për ndarjen dhe paketimin e drogës ata thonin; “do vij ta pjek mishin në sgarë”, ndërsa kur flisnin për sasinë e drogës thonin “a kushton shumë apo si zakonisht?”.
Trembëdhjetë arrestime për drogë që nga fillimi i vitit 2022
Që nga fillimi i vitit 2022, policia e Veronës ka arrestuar 13 persona dhe kanë sekuestruar mbi 42 kilogramë drogë.
“Ky operacion i mëtejshëm i rëndësishëm tregon, pra, se si vëmendja dhe angazhimi i vazhdueshëm i Guardia di Finanza është gjithmonë i lartë për të luftuar trafikimin e drogës dhe për të çmontuar kontekstet kriminale që korrin fitime të mëdha, për të mbrojtur ligjshmërinë dhe sigurinë e qytetarëve”, tha Fiamme Gialle.
