Kryeministri Edi Rama ka zhvilluar një takim me drejtuesit e rinj të PS nëpër qarqe të ndryshme të vendit, ku shprehu se nuk ishte i kënaqur me procesin e zgjedhjeve pasi numri i grave bashkëkryetare ishte tepër i ulët.
Rama u bëri thirrje ndaj drejtuesve të rinj që të kontribuonin për të sjellë risi të reja në parti dhe jo të mësonin hilet e atyre që kishin më shumë kohë aty.
“PS duhet të jetë një parti e territorit jo një parti e mbyllur brenda një rrethi njerëzish që bëjnë çmos të zgjidhen dhe më pas rrinë me njëri-tjetrin, bëhen shokë, pinë kafe në të njëjtin vend dhe që flasin vetëm me njëri-tjetrin.
Bindja ime ka qenë dhe mbetet se cilido që merr një përgjegjësi të tillë përsipër, duhet të ketë ambicien që t’i japë dicka të re partisë. Jo të jetë një i ri që për pak muaj të bëhet më i vjetër se vetë partia dhe që merr hilet para rregullave.
Pavarësisht se sekretariati e ka shprehur vlerësimin për këto zgjedhje, unë mbetem i palumtur për ta thënë me një fjalë jo shumë të rëndë për faktin që ne kemi bashkëkryesinë e partisë në vetëm 23 bashki dhe në bashkitë e tjera, kemi 5 kryetare partie dhe kemi vetëm burra.
Përgjigjia e sekretariatit lidhur me këtë është se nuk kishte gra në këto zona. Sa herë që e dëgjoj këtë përgjigjie, mua më lind pyetja, burrat në atë zonë kush i lind dhe me kë i lindin fëmijët? Me njëri-tjetrin? Nëse nuk paska gra dhe vajza në këto zona. Pyetja që unë bëj është po aq idiote sa përgjigjia që jepet. PS na qenka një parti vetëm me burra”, u shpreh Rama.
