Zhvillimet e fundit tregojnë se kryeministri italian Mario Draghi do të kthehet mbrëmjen e sotme në pallatin presidencial, Kirinalio, për të konfirmuar dorëheqjen.
Vendimi i tij, siç raportojnë mediat italiane, vjen për faktin se Pesë Yjet, si dhe qendra e djathtë (Forza Italia dhe Lega) nuk do të marrin pjesë në procesin e votëbesimit, që sapo ka nisur në Senatin e Romës.
Kjo do të thotë se edhe numri minimal i kërkuar (50% e senatorëve plus një) mund të mos sigurohet që kjo votë të konsiderohet e vlefshme. Kryeministri teknokrat italian, duket se do ta konsiderojë këtë zhvillim si mungesë besimi dhe respekti ndaj personit të tij dhe pritet të shkojë në pallatin presidencial për të finalizuar dorëheqjen e tij, me një takim të ri me presidentin Mattarella.
Draghi tha sot se është gati të rindërtojë koalicionin qeverisës, duke theksuar se ai nuk mund të injorojë rritjen e mbështetjes për të për të qëndruar në pushtet. Duke folur në Senatin italian, fjalët e Draghi sugjerojnë se ai është i gatshëm të qëndrojë në pushtet, por vetëm nëse partitë politike të Italisë janë të gatshme t’i qëndrojnë besnikë atij dhe agjendës së tij politike. Në të njëjtën kohë, ai kritikoi partitë që ai tha se po punonin për të minuar axhendën e qeverisë, duke deklaruar besnikëri ndaj koalicionit.
Kryeministri Mario Draghi dha tmë 14 korrik dorëheqjen mes një krize politike në Itali. Draghi i mbijetoi një votimi mosbesimi në Senatin italian të enjten, megjithatë e ardhmja e qeverisë së tij u vu në pikëpyetje për shkak të një bojkoti të votimit nga Lëvizja populiste 5 Yjet (5SM), një aleat kyç i koalicionit. Dorëheqja e tij megjithatë nuk u pranua nga presidenti i vendit Sergoi Mattarella i cili i kërkoi që të tentonte të rindërtonte qeverinë.
