Një burrë u qëllua për vdekje në Paris në rrugën Popincourt, në lagjen e 11-të.
Katër persona të tjerë mbetën të plagosur lehtë nga të shtënat, motivi i të cilave nuk dihet. Njëri nga dy sulmuesit u arrestua, tjetri arriti ta humbiste gjurmët.
Sipas të dhënave të para, dy persona kanë zbritur nga një makinë dhe kanë hapur zjarr ndaj dy personave të ulur në një tavolinë kafeje. Ngjarja dyshohet se ka ndodhur për larje hesapesh.
I intervistuar nga shtypi francez, Antoine, menaxher i një restoranti aty pranë, tha se “pa një makinë duke mbërritur” dhe më pas përshkroi armën e përdorur, duke folur për “një mitraloz ose një kallashnikov”. Thjesht pata kohë t’i them personelit të hyjë brenda. Të gjithë kanë ikur”, shtoi ai, sipas të cilit sulmi do të zgjaste “20-30 sekonda”.
Të shtënat shpërthyen jashtë një lokali shisha dhe ishin klientët e lokalit ata që bllokuan një nga dy të dyshuarit. Hetimi iu besua rrethit të dytë të policisë gjyqësore të Parisit.
