Eksperti i ekonomisë Pano Soko tha në emisionin ‘Task Force’ në Syri Tv se Qeveria me iniciativën e amnistinë fiskale, do të vrasë të vetmen rrugë që ka drejtësia për të arritur tek paratë e korrupsionit, pra tek paratë e qeveritarëve.
I pyetur se përse kryeministri Edi Rama po e bën tani amnistinë fiskale duke rrezikur dhe çeljen e negociatave, Soko tha se nëse negociatat çelen, autonomia, pavarësia e qeverisë bie.
Soko tha se vetëm në Tiranë janë pastruar mbi 30 miliardë dollarë me pasuri të paluajtshme ndërsa shtoi se po numërohen orët e fundit të qeverisë për të shpëtuar veten me amnistinë fiskale.
“Po e bëjnë për veten e tyre, do përfitojë dhe krimi bashkë me këta. Disa përfitime që kanë. Trungu kryesor pse e bëjnë është që kur këta nesër të mos kenë më pushtet dhe kontroll mbi organet e drejtësisë, të kenë bllokuar të vetmen rrugë që ka drejtësia për të arritur tek ata, për të ndjekur paranë. Kjo është arsyeja kryesore e Edi Ramës.
Sovraniteti bie nëse çelen negociatat. Prandaj kërkon në këtë moment, numërohen orët e fundit të sovranitetit të plotë të qeverisë shqiptare mbi ligjet e vendit, e shoh si përpjekje të qeverisë për të shpëtuar veten.
Paratë e krimit janë pastruar me kohë dhe po pastrohen, janë të gjithë të kënaqur. Vijnë para pafund, futen, legalizohen, futen në sistem.
Me pasuri të paluajtshme janë pastruar me mbi 20 apo 30 miliardë dollarë vetëm në Tiranë. Vlerat e pasurisë së paluajtshme janë ngritur me para që nuk ua dimë origjinën. Problemi është te lekët e inceneratorëve, tek paratë e korrupsionit.”-tha Soko.
