Aventura e Edison Ndrecës te Partizani zgjati fare pak. Anësori i majtë u huazua nga Kukësi vetëm për duelet europiane të ekipit kryeqytetas.
27-vjeçari u aktivizua si zëvendësues në dy përballjet ndaj Saburtalos, që eliminoi Partizanin me penallti në raundin e parë të Conference League.
Në takimin e kthimit të së enjtes, Ndreca u hodh në fushë në minutën e 82’, ndërkohë që trajneri Mehmeti i befasoi të gjithë duke e nxjerrë nga fusha në 109’.
Lojtari mirditor nuk ka humbur kohë dhe është rikthyer menjëherë te Kukësi, duke iu bashkuar ekipit të Gegës në stërvitjen e së premtes pasdite.
Skuadra do te zhvilloje sot stërvitjen e radhës. E diela pushim, teksa duke nisur nga e hëna, Kukësi do të vijoje me përgatitjet në Tiranë deri në 25 korrik, datë kur do të udhëtojë në drejtim të Turqisë për fazën përgatitore.
