Tre persona kanë humbur jetën në një atentat të mirëorganizuar, ndërsa automjeti ku ata udhëtonin u qëllua me breshëri automatike. Dy nga viktimat mësohet se kanë mbetur në automjet, i cili është përfshirë nga flakët, ndërsa viktima e 3-të është qëlluar teksa ka dalë nga automjeti në një tentativë për të shpëtuar.
Automjeti mbi të cilin është qëlluar i përket një shtetasi nga zona e Fushë Kuqes në Kurbin, por nuk dihet nëse pronari i automjetit ndodhej ose jo në makinë.
Bazuar në të dhënat e para, raportohet se ndaj automjetit ku ndodheshin viktimat, është qëlluar nga një tjetër automjet, i cili ka ecur paralelisht me atë të viktimave, duke qëlluar me breshëri. Grupi hetimor ka gjetur së paku 50 shenja plumbash në automjetin e viktimave. Mendohet se në atentat kanë marrë pjesë së paku dy persona, ndërsa është përdorur një armë kallashnikov.
Një prej viktimave dyshohet se është Diklen Vata, nga Laci. Mendohet se 30-vjeçari ishte objektiv i atentatit, ndërsa ai ka tentuar të largohet nga automjeti. Nga raportimet mësohet se Vata është arrestuar më parë për trafik droge, ndërkohë që vitet e fundit ndodhej jashtë Shqipërisë.
Diklen Vata është arrestuar nga policia e Tiranës në vitin 2017, kohë kur zyrtarisht u tha se ai u kap me disa doza kokainë fshehur në çorape dhe në çelësat e makinës.
Policia njoftoi se “më datë 27.09.2017 arrestoi shtetasin Diklen Vata, 25 vjeç, banues në Laç. Gjatë kontrollit fizik të ushtruar ndaj këtij shtetasi tek zona e shkollës “Bajram Curri”, i është gjetur e fshehur në çorape një mbështjellëse me kokainë si dhe 3 mbështjellëse të tjera të fshehura në çelësat e makinës”.
“Në vijim është ushtruar kontroll në banesën e shtetasit Diklen Vata, ku gjatë kontrollit të ushtruar i janë gjetur dhe 18 mbështjellëse të tjera me lëndë narkotike kokainë.
Janë sekuestruar në cilësinë e provës materiale 22 doza me lëndë narkotike e dyshuar e llojit kokainë e cila rezultoi e peshës 11.4 gramë, 3 aparate celularë, mjeti i markës “Rover”.
Materialet iu referuan Prokurorisë së Rrethit Gjyqësor Tiranë në ngarkim të shtetasit të lartpërmendur për veprën penale ” Prodhim dhe shitja e lëndëve narkotike””, njoftonte në atë kohë policia.
Dy viktimat e tjera dyshohet se janë Besmir Hoxha dhe Brilant Martinaj. Brilant Martinaj është kushëriri i Ervis Martinajt. Brilant Martinaj dyshohet se ka vrarë Xhulio Prelën në vitin 2020.
Brilant Martinaj dyshohet se ka qenë personi ndaj së cilit është qëlluar me armë nga atentatorit.
Ka dyshime se shkak ka qenë hakmarrja ndaj tij. Martinaj dyshohet se ka qenë përfshirë në disa ngjarje kriminale.
Pas atentatit, një makinë është gjetur e djegur në fshatin Larushkë. Policia dyshon se kanë qenë disa atentatorë, ndërsa po punon për të kapur autorët.
Kush është Brilant Martinaj, që dyshohet se ka qenë shënjestër i atentatit
Brilant Martinaj është një nga viktimat e atentatit të ndodhur në Fushë Krujë.
Martinaj është kushëriri i parë i Ervis Martinaj, person i njohur i botës së krimit, shpallur në kërkim, pas dëshmisë së Nuredin Dumanit.
Brilant Martinaj dyshohet për vrasjen e efektivit Xhuliano Prela, ngjarje e ndodhur gjatë kohës së pandemisë.
Po ashtu, Martinaj dyshohet edhe për vrasjen e policit Xhelal Reci, ngjarje e ndodhur në Lac, vitin e kaluar.
“Rreth orës 07:23 ,në afersi të një banke, në qytet Laç, Kurbin. në rrethana ende të paqarta është vrarë me armë zjarri shtetasi Xh.R. Shërbimet e Policisë kanë rrethuar zonën, si dhe janë ngritur pika kontrolli, me qëllim kapjen e autorit. Në ndihmë të Policisë lokale janë nisur grupe të FNSH-së dhe një grup i posaçëm hetimor për të bërë të mundur zbardhjen e plotë të rrethanave të ngjarjes, identifikimin dhe kapjen e autorëve”, thuhet në njoftimin e policisë”, njoftonte policia për ngjarjen.
