Pajisje të dyshimta përgjuese e transmetuese, USB, laptop, si dhe pajisje të tjera elektronike, raportohet se janë gjetur në banesat e mjediset e tjera, të 20 muxhahedinëve, gjatë kontrollit që është ushtruar me urdhër të SPAK, në kuadrin e një operacioni kundër spiunazhit.
Nga raportimet mediatike, të cilat i referohen burimeve të SPAK, grupi i muxhahedinëve, dyshohet se ishin rekrutuar nga shërbimet iraniane, me qëllim organizimin e një sulmi në kampin e MEK, në Manëz, atje ku janë streuar mijëra muxhahedinë.
Në dosjen hetimore të SPAK, thuhet se gjatë kontrolleve në banesat e 20 ish-muxhahedinëve janë gjetur pajisje të dyshimta përgjuese e transmetuese, si dhe pajisje të tjera elektronike.
SPAK ka pasur dyshime se shumat e parave që merrnin nga shërbimet sekrete iraniane, ish-muxhahedinët mund t’i kishin në banesat e tyre në Tiranë.
Rezulton se nga kontrolli janë sekuestruar pajisje të ndryshme elektronike, laptopë, telefona, USB, karta sim, pajisje përgjuese e transmetuese.
Prokuroria po këqyr këto pajisje për të zbuluar edhe personat me të cilët ata bashkëpunonin, duke qenë se 300 ish-anëtarë të kampit kanë arritur të largohen nga Shqipëria.
Në dosje thuhet se po bashkëpunohet me organet e huaja ligjzbatuese për të zbuluar nëse ata kanë qenë të përfshirë në akte terrori.
