Këshilli për Rregulloren, Mandatet dhe Imunitetin është mbledhur sot për të diskutuar për mandatin e deputetes, Olta Xhaçka.
Deputetët e Partisë Demokratike akuzojnë ministren për konflikt interesi pasi bashkëshortit i saj, Artan Gaçi u shpall investitor strategjik në bregdetin e jugut. Ndërsa të drejtën për të shfrytëzuar plazhin për 30 vite e mori kompania e bashkëjetueses së vëllait të ministres.
Agron Shehaj tha se ministrja Olta Xhaçka ka shkelur me vetëdije Kushtetutën në lidhje me ligjin për investimet strategjike dhe ka kryer veprime fiktive për ta fshehur atë.
Shehaj deklaroi se ministrja Xhaçka ka paraqitur kunatën e saj si investitore strategjike dhe kjo provohet nga adresa e përbashkët e vëllait të saj dhe zonjës në fjalë, nga postimet në rrjetet sociale, si dhe nga intervistat e bashkëshortit të ministres.
Ai tha se Xhaçkës i duhet hequr mandati e më pas duhet hetuar penalisht nga SPAK.
“Më lejoni të sqaroj dy momente që na dallojnë nga deputetët e tjerë. Një nga elementët e kërkesës sonë që na dallon nga kolegërt është përdorimi i zonjës Saton nga deputetja Olta Xhaçka për të feshur shkeljen e nenit 70 të Kushtetutës. Deputetja Xhaçka dhe bashkëshorti i saj paraqitën zonjë Saton si investitore strategjike, por ne kemi sjellë prova se ajo nuk është një investitore e huaj, por thjesht kunata e deputetes Xhaçka Zonja Saton nuk është investitore, pasi ajo nuk ka asnjë përvojë në biznesë dhe as mjetet financiare për të kryer një investim të tillë. Zonja Saton është shpallur investitore strategjike sepse ajo është pjesë e familjes Xhaçka që provohet nga adresa e vetëdeklaruar e vëllait të Olta Xhaçkës dhe zonjës Saton, postimet në rrjete sociale si dhe intervista në media e bashkëshortit të ministres. Kemi vërtetuar që zonja Xhaçka jo vetëm që ka shkelur Kushtetutën dhe me veprime fiktive është munduar ta fshehë këtë fakt me kunatën e saj”, tha Shehaj.
